«Дагдыныкчылар: чанында эвес, а кады турар» деп төлевилелди Тыва Республиканыӊ Экономиктиг хөгжүлде болгаш үлетпүр яамызы боттандырып эгелей берген.
Республиканыӊ сайгарлыкчылары, бизнес ниитилелдериниӊ удуртукчулары элээди назылыг оолдарга, уругларга чөленгииш болуп, ажыл-амыдыралга чаӊчыктырып өөредир, ажыктыг сүме бээр дагдыныкчылар кылдыр каттыжып алган. Олар республиканыӊ школа-интернады «Тываныӊ кадеттер корпузунда» доозукчулары-биле ужуражып, сүмележип, чүнү кылып эгелээрин дугуржуп алган.
«Дагдыныкчылар: чанында эвес, а кады турар» деп программаныӊ кол сорулгазы болза амыдыралдыӊ берге байдалында таваржып чоруур элээди назылыг оолдарныӊ, уругларныӊ боттарыныӊ эки талазын, сонуургалын көрүп тургаш, боттуг дуза чедирери.
Хуу сайгарлыкчы Лиана Моӊгуш дагдынып алган уруглары-биле ужуражып чугаалашкан. Олар «Нейросмен» кылымал интеллект талазы-биле курстарга январь 6-дан тура өөренип кирипкен. Анай-Хаак Куулар, Оргаадай Делгер ол курстарны дозуп алгаш, улаштыр «Алгоритмика» төвүнге программирование биле графиктиг дизайн талазы-биле өөренир. Информастыг технология талазы-биле тускай мергежилдиг специалистер болурунга ынчаар дузалап турары ол.
«Дуӊзаачы-сварщик» мергежил өөренип турар Каӊ-Демир Баянга, келир үениӊ повары Александра Неволинага хуу сайгарлыкчы Чойгана Моӊгуш база дузалажып турар.
Амыдыраар акша-хөреӊгини ажылдап алыр бизнес мергежил дугайында билиглерин үлежип, сайгарлыкчы карьераны канчаар эгелеп алырын сүмелээрин планнап турар.
Тыва Республиканыӊ Үлетпүржүлер болгаш сайгарлыкчылар эвилелиниӊ күүсекчи директору Шуглур Доржу сургуул Адыгбай Чеченге дузалажырын хүлээнип алган. Бир дугаар ужуражылгазыныӊ үезинде, Чаа чыл-биле байыр чедирбишаан, «Спортмастер» садыыныӊ 3000 рубль сертификады биле чигирзиг белекти бергеш, чедиишкинниг кызымак өөренир дээрзин чагып чугаалаан.
«Россияныӊ чөленгиижи» деп сайгарлыкчыларныӊ хөй-ниити организациязыныӊ регионалдыг салбырыныӊ даргазы Марина Куулар – дөрт кижиниӊ Никита Шыырап, Айыраа Галандарян, Айбек Оюн, Норбу Дирчинниӊ дагдыныкчызы. Амыдыралчы сорулгазын тодарадып, билиин, угаан-медерелин хүн-бүрүде сайзырадып, чедиишкинниг чоруктуӊ чаӊчылдарын билип алырынга өөредип турар.
Хуу сайгарлыкчы Чодураа Кара-Монгуш - база бир доозукчунуӊ дагдыныкчызы. Ол Амгы үеде Аннета Кууларныӊ мергежилин сайзырадырынга дузалап турар.
Амыдыралчы болурунга арга-сүмезин кадып, ажыл-агыйжы чаӊчылдарны айтып берип чорууру дээрге өзүп олурар салгалдарга чедиишкинниӊ оруун ажыдып бергени-дир.
«Дагдыныкчылар: чанында эвес, а кады турар» деп төлевилелдиӊ ачызында сайгарлыкчылар, бизнесменнер социал харыысалгазын күүседип, аныяктарныӊ амыдыралын өскертип болур. Программаныӊ негелдези ёзугаар дагдыныкчы бүрүзү уруглар-биле алды ай дургузунда алды ужуражылганы эрттирер.
Р.ДЕМЧИК.