“УЛУГ ӨӨРЕДИГ” ШЫДЫРАА МАРГЫЛДААЗЫ
Калмыкияның төвү Элиста хоорайда Элээдилерниң чогаадылга ордузунга сентябрь 18-23 хүннеринде сарыг шажынның “Улуг Өөредиг” деп I делегей чергелиг Рапид база Блицке дүрген шыдыраа маргылдаазы болуп эрткен. Ук маргылдаа сентябрь 25-28 хүннеринде Калмыкияга болган III Делегей чергелиг сарыг шажын шуулганынга солун ажыдыышкынны кылып, эгезин салган. Аңаа шупту 35 шыырак, сонуургак элээди ойнакчылар база Россияның Бурят, Калмык, Тыва республикалардан база Азиядан Таиланд, Мьянма, Лаос, Непал, Индиядан 8 команда киришкен.
Маргылдааның ажыдыышкынында Калмыкияның Шыдыраа федерациязының удуртукчузу Алексей Этеев маргылдааның киржикчилеринге байырны чедирип база спортчу чедиишкиннерни күзээн. Азия чурттарындан келген ойнакчыларга сарыг шажынның үнелиг өөредиглерин база шыдырааның нарын аргалары бурун шагдан тура аразында быжыг харылзаалыын демдеглээн. Россияда шажын өөредиин база спортчу быжыг харылзааны чорудары дээрге-ле чурттар аразынга улуг эп-найыралды тургузары болур. Ол ышкаш шыдыраа оюну тускай күштүг болгаш дылдыг болуп, XXI чүс чылда бедик угаанныг уругларны, аныяктарны эртемге белеткээринге кол черни ээлеп турарын дыңнаткан. Соонда барып Россияда сарыг шажын биле шыдырааның бир төвү болур Калмыкияга бо делегей чергелиг шыдыраа маргылдаазы чылдың-на чаңчыл болуп эртериниң йөрээлин салган.
Дүрүм ёзугаар баштай Рапид, улаштыр Блиц маргылдаалары элээдилер, херээжен ойнакчылар, сонуургактар, шыырактар база командалар аразынга көрүштүг, солун болган. Түңнелинде элээдилер аразынга Рапид ойнаарынга 1-ги черни Тамерлан Чындыгыр (Тыва, Россия), 2-3-кү черлерни Пурушоттам Силвал (Непал) база Джонатан Бодемар (Таиланд) алганнар. Блицке 1-ги черни Пурушоттам Силвал (Непал), 2-3-кү черлерни Сойжина Комиссарова (Бурятия, Россия) база Джонатан Бодемар (Таиланд) алганнар. Дараазында сонуургактар бөлүүнге Рапид ойнаарынга 1-ги черни Тарас Минтаханов (Бурятия, Россия), 2-3-кү черлерни Начын Чамзы (Тыва, Россия) база Антоний Нава-Марк (Филиппиннер) алганнар. Блицке 1-ги черни Начын Чамзы (Тыва, Россия), 2-3-кү черлерни Богдан Мастерских (Калмыкия, Россия) база Тарас Минтаханов (Бурятия, Россия) алганнар. Улаштыр херээжен ойнакчылар бөлүүнге Рапид ойнаарынга 1-ги черни Баира Кованова (Калмыкия, Россия), 2-3-кү черлерни Сойжина Комиссарова (Бурятия, Россия) база Натрада Куэваттхана (Таиланд) алганнар. Блицке 1-ги черни Баира Кованова (Калмыкия, Россия), 2-3-кү черлерни Арина Иргит (Тыва, Россия) база Арайя Проммуанг (Таиланд) алганнар. Шыырак ойнакчылар аразынга Рапидке 1-ги черни Санан Сюгиров (Калмыкия, Россия), 2-6 дугаар черлерни Жамсаран Цыдыпов (Бурятия, Россия) база Роман Шогджиев (Калмыкия, Россия), Даниэль Кизион (Филиппиннер), Александр Утнасунов (Калмыкия, Россия), Тханадон Кунпхрыттханон (Таиланд) үлешкеннер.
Блиц ойнаарынга 1-ги черни Жамсаран Цыдыпов (Бурятия, Россия), 2-6 дугаар черлерни Даниэль Кизион (Филиппиннер), Санан Сюгиров (Калмыкия, Россия), Тамерлан Чындыгыр (Тыва, Россия), Александр Утнасунов (Калмыкия, Россия), Тимур Иванов (Бурятия, Россия) үлешкеннер.
Командалар аразынга Рапид ойнаарынга 1-ги черни Бурятия, 2-3 черлерни Тыва база Калмыкияның командалары алганнар. Блиц ойнаарынга 1-ги черни Бурятия, 2-3-кү черлерни Калмыкия база Тыва алганнар. Командалар аразынга ниити түңнелдер: 1-ги черни Бурятия, 2-ги черни Калмыкия, 3-кү черни Тыва алганнар.
Тываның Шыдыраа федерациязының даргазы Ренат Ооржактың дыңнадыы-биле, бо делегей чергелиг маргылдаага бистиң аныяк шыдыраачыларывыс тренер башкы Чечек Ховалыгның удуртулгазы-биле кончуг эки ойнааш, командазы 3-кү шаңналдыг черни алганы улуг чедиишкин болур. Ол ышкаш элээдилер аразынга Рапидке Тамерлан Чындыгырның, сонуургактар аразынга Блицке Начын Чамзының алдын медальдарны, кубоктарны, тускай шаңналдарны алганы база херээженнер аразынга Блицке Арина Иргиттиң мөңгүн медальга төлептиг болганы, тренер башкылар Сергей Түлүштүң база Ивахинаның, Эдуард Ховалыгның улуг ачы-хавыяазы болур.
ПРЕЗИДЕНТИНИҢ СПОРТЧУ ОЮННАРЫ
Школачылар аразынга Тиилелгениң 80 чыл оюнга тураскааткан Президентиниң спортчу оюннары деп солун маргылдаалар сентябрь 28-те “Смена” деп Бүгү-россия чергелиг уруглар төвүнге доозулган. Аңаа ниитизи-биле Президентиниң Кубогу дээш Россияның 82 девискээринден 992 школачы киришкен. Бистиң республикадан ол оюннарга Кызыл-Мажалыктың 1 дугаар школазының өөреникчилери киржир эргелиг болганнар. Чаңчыл болган маргылдааның түңнел оюннарын Россияның Чырыдыышкын болгаш Спорт яамылары база “Прогресс” чаштарның бүгү талазы-биле сайзырал төвү, “Баштайгыларның шимчээшкини” элээдилер болгаш аныяктарның Бүгү-российжи шичээшкини идепкейлиг эрттиргеннер.
Оюннарның чурумун ёзугаар 3 ойнакчы баскетбол, хол бөмбүү, чиик атлетика, уругларның стол теннизи, оолдарга 5 ойнакчылыг бут бөмбүү, гандбол, черниң уг-шиин тывары, спортчу аян-чорук, самбога, шыдыраага спортчу маргылдаалар болган. Оюннарның түңнелинде, Коми республиканың Сыктывкарның 9 дугаар школазының командазы эң эки көргүзүглүг 1-ги черже үнүп, Президентиниң Кубогунга, грандызынга төлептиг болганнар. Ийиги черни Белгород хоорайның 50 дугаар школазының өөреникчилери мөңгүн медальга, үшкү черни Красноярск крайдан Богучанның 3 дугаар школазының командазы хүлер медальга төлептиг болганнар.
Ол оюннарга Кызыл-Мажалыктың 1 дугаар школазының өөреникчилери самбога тергииннер аразынче киргеннер. Уруглар аразынга Алина Сарыглар 47 килге 3-кү черни (хүлер медаль), 59 килге Сайлаана Бегзи 2-ги черни (мөңгүн медаль) төлептиг болганнар. Оолдар аразынга 3-кү черлерни (хүлер медальдарга) 54 килге Алдар Иргит, 59 килге Буян Хомушку алганы улуг өөрүшкү болган.
ЧАЗАК ДАРГАЗЫНЫҢ ШАҢНАЛЫ
"Сүбедей" спорт ордузунга сентябрь 24-27 хүннеринде 14 эр база 15 херээжен шыырак командалар аразынга Чазак Даргазының шаңналы дээш хол бөмбүүнүң маргылдаазы болган.
Чидиг, солун оюннарның түңнелинде эр ойнакчылар аразынга 1-ги черже “Дөгээ” командазы үнүп, Кубокту чаалап алган. 2-4 дугаар черлерни Чөөн-Хемчиктиң, Онза байдалдар яамызының, Улуг-Хемниң командалары алганнар. Херээжен ойнакчылар аразынга 1-ги черни Чеди-Хөлдүң командазы алгаш, Кубокту чаалап алганнар. 2-4 дугаар черлерни Кызыл хоорайның Төлээлекчилер хуралының, Улуг-Хем, Ак-Довурак хоорайның командалары үлешкеннер.
Тускай шаңналдар: херээжен улус аразынга “Тергиин халдакчы” — Алдын-Сай Сарыглар (Төлээлекчилер хуралы), “Тергиин көдүрүкчү” — Аэлита Ховалыг (Ак-Довурак), “Тергиин ойнакчы” — Айзаана Хомушку, “Тергиин камгалакчы” — Азияна Найдал (Улуг-Хем); эр улус аразынга “Тергиин халдакчы” — Байыр Монгуш (Чөөн-Хемчик), “Тергиин көдүрүкчү” — Айдың Салчак (“Дөгээ”), “Тергиин ойнакчы” — Эрелчин Белек (ОБЯ), “Тергиин камгалакчы” — Ай-Херел Манмаш (Улуг-Хем).
Алексей ЧАМБАЛ-ООЛ, спорттуң хоочуну.
Чуруктарны авторнуң хууда архивинден алган.
“Шын” №38 2025 чылдың октябрь 2