Самбога Анатолий Кара-Салдың хүлер медалы
Узбекистанда бурун Бухара хоорайның “Универсал” спорт ордузунга октябрь 24-26 хүннеринде, хоочун хевис мастерлериниң аразынга самбога делегей чемпионады болуп эрткен.
Аңаа делегейниң 35 чуртундан 35 хардан өрү 7 бөлүк аразынга 400 хире эр база херээжен дуржулгалыг тренер башкылар, хоочун мөгелер киришкен. Чемпионаттың ажыдыышкынында узбек чон боттарының чараш чаңчылдары-биле аалчыларын хүндүлеп уткааннар. Маргылдаа үезинде солун төөгүлүг музейлерни, парктарны көргүзүп, мөгелерниң сонуургалын көдүргеннер. Чемпионатка 65 хардан өрү 64 килдиг мөгелер аразынга бистиң 71 харлыг хоочун мөгевис Анатолий Кара-Сал 3-кү черни ап, хүлер медальды чаалап, өртектиг белекти алганы улуг өөрүшкү болган.
Тывадан чааскаан хүрешкеш, шаңналче киргени аныяктарга үлегер болур. Хоочун мөге самбодан аңгыда, хостуг хүрешке хоочуннар аразынга делегей чемпионаттарының хөй дакпыр шаңналдыг черлеринче кирип чораан. Ол тыва хүрештиң шыырак хоочуннарының аразынче кирип чоруур. Россияның мөгелери бо чемпионатка самбога Делегей чөвүлелиниң адындан киришкеннер. Түңнелинде команда аайы-биле бирги черни алганнар.
Делегей чергелиг дзюдо фестивалы
Октябрь 24-25 хүннеринде Барнаулга бүгү делегейде Дзюдо база Бүгү-россияда автомобилистер хүнүнге тураскааткан Делегей чергелиг дзюдо фестивалы болган. Аңаа Кызылда Олимп аттыг ОКСШ-тың тренери Синухет Сендажының удуртулгазы-биле 8 өөреникчизи чедиишкинниг киришкеннер. Оларның аразындан 46 килге 1-ги черге Аюш Хертек, 3-кү черлерге 46 килге Айдыс Куулар, 55 килге Давид Доңгак биле Айырат Дамбыра, 66 килге Бадма Кара-Сал, 73 килден өрү Лопсан Монгуш төлептиг болганнар.
Бүгү-Россия чергелиг хостуг хүреш
Россияның алдарлыг спорт мастери Заур Ботаевтиң шаңналы дээш Бүгү-россия чергелиг хостуг хүреш маргылдаазынга бистиң мөгелеривис чедиишкинниг хүрешкеннер. Түңнелинде 86 килдиг мөгелер аразынга бүзүрелдии-биле 1-ги черге Чимит-Доржу Бады төлептиг болган. База ол ышкаш шаңналдыг 3-кү черлерни 65 килге Ай-Демир Попуу база Сыдым Куулар 92 килге алганнар.
Панкратионга Россия Кубогунуң чемпиону
Иркутск хоорайның Труд аттыг спорт ордузунга Тиилелгениң 80 чыл оюнга, Ада-чурт камгалакчыларының чылынга база ТШО-нуң киржикчилеринге тураскааткан панкратионга Россияның Кубогу дээш маргылдаа болган. Аңаа 18 девискээрден 500 хире спортчулар киришкен. Аңаа Кызылда ОКСШ-тың мөгези Чаян-Кежик Монгуш 57 килдиг мөгелер аразынга, тренер башкызы Хүреш Сарыгларның удуртулгазы-биле чараш хүрешти көргүзүп, 1-ги черни алганы улуг чедиишкин болур.
Дзюдо, хостуг хүреш, панкратионга тыва мөгелерниң улуг чедиишкиннерлиг болганы дээш ада-иелеринге база тренер башкыларынга изиг байырны чедирдивис.
/ Алексей Чамбал-оол, спорттуң хоочуну.
Чуруктарны интернеттен хоолгалаан.
“Шын” №42 2025 чылдың октябрь 30