Коркин аттыг делегей маргылдаазы
Якутияның “Триумф” спортчу белеткел төвүнге Якутияның, РСФСР-ниң, ССРЭ-ниң алдарлыг тренери Дмитрий Петрович Коркинге тураскааткан делегей чергелиг XVI хостуг хүреш маргылдаазы болуп эрткен. Аңаа 11 даштыкы чурттардан: Aвcтpaлия, Aзepбaйджaн, Бeлopyccия, Kyба, Kыpгызcтaн, Cоңгу Maкeдoния, Moлдoвия, Moнголия, Taджикиcтaн, Мурнуу Kopeя, Япoния база Рoccияның 8 регионундан 215 мөге киришкен. Бистиң республикадан 8 мөге күжүн шенээн: делегей чергелиг спорт мастерлери 61 килге Кежик Монгуш, 65 килге Кежик Чымба, спорт мастерлери Давид Сагды (61 килге), Эзир Тюлюш биле Чаяан Монгуш (65 килге), Баяр-Сайхан Бады (86 килге). Ол ышкаш аныяк шыырак мөгелер Алдын-Херел Кара-Сал (70 килге) база Алаш Монгуш (92 килге) хүрешкеннер.
Маргылдааның ажыдыышкынында Саха-Якут Республиканың чазак баштыңы Айсен Николаев, оралакчызы Сергей Местников мөгелерни, хүндүлүг аалчыларны Саха-Уранхай чаңчыл-биле бедик деңнелге уткуп алган. Оларның аразында хүндүлүг аалчылар Олимпий оюннарының 2 дакпыр чемпиону Сергей Белоглазов, хүлер медалының эдилекчизи амгы үеде хостуг хүрешке Россияның улуг тренери Денис Царкуш, делегей чемпиону япон тренер Юки Такасахи олар келген. Ол ышкаш алдарлыг тренер Дмитрий Коркинниң өөнүң ишти Александра Семёновна база уруу Ия Дмитриевна киришкени өөрүнчүг болган.
Чазак баштыңы Айсен Николаев 2028 чылда саха чоннуң алдарлыг оглу, тренер Дмитрий Коркинниң 100 чылдаан юбилейинде бедик деңнелдиг делегей маргылдаазын эрттирериниң доктаалында ат салганын аалчыларга дыңнаткан.
Маргылдааның 1 дугаар хүнүнде-ле 9 саха мөге түңнел хүрешче үнгени кайгамчык чедиишкин болган. Түңнелинде XVI дугаар делегей чергелиг хостуг хүреш маргылдаазынга саха-якут мөгелер 5 алдын, 4 мөңгүн, 2 хүлер медальдарны алганы улуг өөрүшкү болган.
Деңзи аайы-биле 1-3-кү черлерни дараазында мөгелер алган:
Эң чиик 57 килге Японияның студентилер аразынга чемпиону, император Кубогунуң шаңналының эдилекчизи Даита Кацуми биле 23 хар чедир мөгелер аразынга Европа чемпиону Саха-Якутияның сунтар улузундан Лев Павловтуң ужуражылгазы солун болган. Ачыр-дачыр хүрештиң түңнелинде 3:1 санга Лев Павлов тиилээш, Коркин турнириниң 2 дакпыр тиилекчизи болган. Ол килге 2-ги черни Даита Кацуми (Япония), 3-кү черни Артур Чебодаев (Красноярск край) биле Егор Явловский (Саха-Якутия) алганнар. Дараазында 61 килге 1-ги черни Такара Суда (Япония), 2-ги черни Бато Сультимов (Бурятия), 3-кү черни Александр Авелов (Саха-Якутия) биле Кежик Монгуш (Тыва) алганнар. 65 килге 1-ги черни Рейджи Учида (Япония), 2-ги черни Владислав Кривошапкин (Саха-Якутия), 3-кү черни Чаяан Монгуш (Тыва) биле Турбаяр Давааням (Моол) алганнар. 70 килге 1-ги черни Виктор Рассадин (Таджикистан), 2-ги черни Константин Капрынов (Саха-Якутия), 3-кү черни Цырен Дугаржапов (Бурятия) биле Тайга Огино (Япония) алганнар. 74 килге 1-ги черни Олег Фомин (Саха), 2-ги черни Эрденебат Тугсжаргал (Моол), 3-кү черлерни Тамир Ешинимаев (Бурятия) биле Сергей Якимов (Иркутск облазы) алганнар. 79 килге 1-ги черни Дмитрий Куприн (Кемерово облазы), 2-ги черни Гарзон Тамайо (Куба), 3-кү черни Никита Сучков (Красноярск край) биле Джабраил Гаджиев (Азербайджан) алганнар. 86 килге 1-ги черни Али Цокаев (Азербайджан), 2-ги черни Буянто Шадапов (Бурятия), 3-кү черни Азрет Улимбашев (Красноярск край) биле Бат-Эрдэнэ Бямбадорж (Моол) алганнар. 92 килге 1-ги черни Ньургун Сергин (Саха-Якутия), 2-ги черни Шамхан Жабраилов (Молдова), 3-кү черни Аркадий Погосян (Беларусь) биле Дмитрий Зайнидинов (Красноярск) алганнар. 97 килге 1-ги черни Константин Пшеничников (Кемерово облазы), 2-ги черни Евгений Аронов (Саха-Якутия), 3-кү черни Юрий Иванов (Иркутск облазы) биле Чингиз Бальжимаев (Бурятия) алганнар. Сөөлгү 125 килге 1-ги черни Никита Сафронов (Саха-Якутия), 2-ги черни Никита Хабаров (Саха-Якутия), 3-кү черни Остап Пасенок (Кемерово облазы) биле Александр Гришин (Воронеж облазы) алганнар.
Маргылдаага шаңнал кирген мөгелерни медальдар, дипломнар, кубоктар база 200, 100, 75 муң акшалар-биле шаңнаан. Тулган тиилекчилерниң тренерлери 50 муң акшага төлептиг болганнар.
Сибирьниң бирги чери дээш шыдыраа маргылдаазы
Новосибирск хоорайның “Спартак” стадионунга октябрь 29-тан ноябрь 10-га чедир чалыы база элээди (11, 13, 15, 17, 19 хар) оолдар, уруглар аразынга Сибирь девискээриниң бирги чери дээш шыдыраа маргылдаазы болуп эрткен. 10 региондан 400 ажыг шыдыраачылар аразынга маргылдаа чурум ёзугаар 4 хевирге болган. Баштайгы ийи хүнде дүрген оюн, дараазында октябрь 31-ден ноябрь 3-ке чедир база ноябрь 5-9 хүннеринде узун оюн, ноябрь 4-те нарын көштер (композиция) бодаарынга, ноябрь 10-да кыска оюнга (блиц) маргылдаалар болган.
Түңнелинде 10 командадан 1-ги черни Новосибирск, 2-3-кү черни Кемерово биле Омск областары алган. Бистиң шыдыраачыларывыстан дүрген оюнга 19 харлыг уруглар аразынга Арина Иргит 3-кү черни ап, хүлер медальга төлептиг болган. Нарын көштүг оюн бодаарынга 15 хар чедир оолдар аразынга Начын Чамзы 2-ги черни алгаш, мөңгүн медальга төлептиг болган. Сөөлгү маргылдаа 5 минута ойнаар блицке 15 хар чедир оолдар, уруглар аразынга Начын Чамзы биле Анастасия Ооржак 3-кү черни ап, хүлер медаль база Кубокту алганнар.
Арина Иргит, Начын Чамзы болгаш Анастасия Ооржактың тренери Сергей Түлүшке, Тамерлан Чындыгырга база Кежик Монгушка элээди шыдыраачыларның белеткелинге улуг үлүүн кииргени дээш өөрүп четтиргенин илереткен.
Элээдилер аразынга баскетбол
"Сүбедей" спорт ордузунга ноябрь 14-15 хүннеринде республиканың Баскетбол чөвүлелиниң Кубогу дээш элээди оолдар аразынга республика чергелиг маргылдаа болуп эрткен. Маргылдааның кол сорулгазы — “Спортту школаже” база “Баскетболду школаже” деп төлевилелдерни боттандырары болгаш баскетболду элээдилер аразынга сайзырадыры.
Ийи хүн үргүлчүлээн маргылдааның түңнелинде дараазында командалар шаңналдыг черлерже кирген: бирги черни Каа-Хем кожууннуң Дерзиг-Аксы школазы, 2 дугаар черни Барыын-Хемчик кожууннуң, 3-кү черни Тес-Хем кожууннуң школачылар командалары алганнар.
Удавас шаңнал кирген командалар Сибирь Лигазынга эң-не шыырактарны илередир маргылдааларга киржири-биле белеткелдери эгелээр. Маргылдааның кол шииткекчизи Чойган Ондарның дыңнатканы-биле, чоокта чаа 2010 чылга чедир оолдар аразынга Сибирьниң 15 шыырак баскетбол командаларының аразынга “Сүбедей” командазы 4 оюндан 3 бүзүрелдиг тиилелгени чедип алган. Аңаа Руслан Базыр биле Эрлан Доңгак оюн бүрүзүнге 20 ажыг саннарны командазынга эккеп, эштериниң хей-аъдын көдүрүп, үлегерни көргүскеннер.
Самбо хүнүнге тураскааткан маргылдаа
Саян Хертек аттыг самбо залынга ноябрь 15-16 хүннеринде Самбо хүнүнге тураскааткан эр улус аразынга республика чемпионады база элээди оолдар, уруглар аразынга республика чергелиг турнир болган. Аңаа ниитизи-биле 210 мөге күжүн шенеп киришкеннер. Оларның аразында 40 улуг мөге база 170 элээдилер хүрешкеннер.
Чемпионаттың кол шииткекчизи, Россияның алдарлыг спорт мастери, самбога делегейниң 3 дакпыр чемпиону Саян Хертек маргылдааның сорулгазын чугаалаан: “Баштай Россия, Европа, делегей чемпионаттарынга киришкеш, шаңналдыг черлерни ээлеп, Россияның чыынды командазының кежигүннерин белеткээрин чедип алыры болур. Дараазында аныяк-өскенниң сонуургалын күштелдирери-биле Кызылга самбо академиязын ажыдарын чедип алырын кызыдар. Ону боттандырарынга бедик дуржулгалыг тренерлер, мөгелер бистиң республикада бары билдингир”.
Чемпионатка шыырак мөгелер дараазында килдерге хүрешкеннер: 53, 58, 64, 71, 79, 88, 98, 98 килден өрү. Оолдар: 42, 46, 49, 53, 58, 64, 71, 79, 88, 88-ден өрү килдерге, а кыс уруглар: 37, 41, 44, 47, 50, 54, 59, 65, 72, 72-ден өрү килдерге хүрешкеннер.
/ Алексей ЧАМБАЛ-ООЛ, спорттуң хоочуну.
Чуруктарны ТР-ниң Баскетбол, Самбо база Уругларның шыдыраа федерацияларының социал четкилеринде арыннарындан база интернеттен алган.
“Шын” №45 2025 чылдың ноябрь 20