Ченрезиг Бурганының мандалазын бузар езулал апрель 2-де болур

Иван Ярыгин аттыг спорт комплекизинде Авалокитешвара (Ченрезиг) Бурганының мандалазын Индияда Дрепунг Гоман хүрээзинден келген төвүт болгаш тыва лама-башкылар март 21-ден эгелеп кылып эгелээн.

Самден Отсер Башкы Ченрезиг Бурганының мандалазының кол утказын тайылбырлаан.

– Мандала дээрге Ченрезиг Бурганның өргээзин кылып тургузуп турары болур. Бо көргүзүг мандала, ону өңнеп каан элезин-биле кылып тур бис. Мандала кылыр тускай херекселдерни лама-башкылар Индиядан эккелген. Ченрезиг Бурганының мандалазын ийи төвүт, ийи тыва башкы кылып турар.

Апрель 2-де мандаланы бузар езулал болур. Ооң соонда айызаан ыдыктыг элезинни чүдүкчүлерге үлээр. Элезинни четтирип алган улус Бурган булуңунга ону камгалал кылдыр шыгжап алыр. Кол-ла чүүл – мандаланы көрүп, тейлеп, сүзүглээри болур – деп, Индияга 16 чыл өөренген Самден Отсер Башкы чугаалаан.

К.С. Күжүгет аттыг культура фондузу Ченрезиг Бурганның чер кырында чаяалгазы Чырыткылыг XIV Далай-Ламага, «Тубтен Шедруб Линг» хүрээзиниң өмээржикчизинге тураскааткан Авалокитешвара (Ченрезиг) Бурганының мандалазының айызын алыр ачы-буян программазынче республиканың чүдүкчүлерин чалап турар.

ТМG Тыва медээлер.
Шончалай Ховалыгның тырттырган чуруу