«Хөмүр продукциязы» күрүнениң информация системазы (ГИС) Тывада ам ийи чыл ажылдап турар. Ооң сорулгазы – хөмүр-даш садыг-саарылгазын ажык-чарлыг болгаш тус черниң чурттакчыларынга чиигелделиг садары.
Тыва Республиканың Чазааның даалгазы-биле тургускан чаа онлайн-сервис хамаатыларга чиигелде алыр эргезин бадыткаан хууда QR-кодту алыр арганы берип турар. Шак ол куар-код-биле хөмүр-дашты «Чадаана» болгаш «Каа-Хем» хөмүр-даш уургайларындан 1 тоннада 2925,37 рубль-биле садып ап болур.
QR-код-биле чиигелделиг өртек-биле хөмүр садып алырының ийи аргазы бар. Бирээде, [cpgu.rtyva.ru] бо айтыгже баскаш, күрүне ачы-дуза порталын таварыштыр бодунуң хууда арнынче киргеш, билдириишкинни чорудар. Ында персоналдыг QR-код бар. Ол бо одалга сезону доозулгужеге чедир күштүг болуп, одаар чүүл садарынга дузалаар.
Бир эвес хамааты онлайн билдириишкин киирип шыдаваан болза, чурттап турар чериниң девискээринде хөй ачы-дузалыг төптерге баргаш, консультацияны ап болур.
Өг-бүлениң чурттаар оран-савазының шөлүнге болгаш республиканың агаар-бойдузунуң байдалынга даянып алгаш, бот-тускайлаң кылыр, кайы хире хөмүр-даш херегин санап үндүрер. Бир эвес чурттаар оран-савазының хемчээли бичежек, ынчалза-даа хөй хөмүр хереглеттинер бажыңныг болзуңарза, дыка муңгараваңар. Садып алыр хөмүрүңерниң хемчээлин улгаттырарда, дараазында дугаарже 8 (39422) 5-15-49 долгааш, хөмүр садып алыр лимидиңерни көвүдедип ап болур силер.
Бүрүткел эртеринге болгаш QR-код кылырынга дуза кадар специалистер кезээде белен.
Айдың ОНДАР.
Буян ООРЖАКТЫҢ тырттырган чуруу.
“Шын” №35 2005 чылдың сентябрь 11