Тывада 2 хуулуг чурттаар оран-сава садып алыр чиигелделиг ипотека берип эгелээнинден бээр ниитизи-биле 5 млрд рубльдиң 1081 керээзи чардынган.
Динамикадан алгаш көөрге, неделя дургузунда 62 ипотека керээзи чардынып турар. Амгы үеде 730 квартира садыглажыышкында турар. Республиканың Тудуг яамызының медээлери-биле алырга, тудугжулар чоокку үеде ам-даа 967 квартираны ажыглалга киирери көрдүнген.
Тускай чөпшээрелдиг тудугжулар эрткен чылдың сентябрь айдан эгелеп регионга 2084 квартираны садып-саарган. Шынында, чаа чуртталга оран-саваларының чартыын чиигелделиг программа-биле, азы дорт садып алган болуп турар. Кижи бүрүзүнге эң-не кол чүүл чурттаар оран-сава болганда, бис бо угланыышкынны ам-даа улаштыр идепкейлиг хөгжүдер бис.
Регионалдыг ипотека программазы бо чылдың июль айга чедир күштүг болур, ынчалза-даа амгы үеде бо адырның хереглели дыка улуг болганы-биле, ооң хуусаазын узадыры көрдүнүп турар. Тудуг яамызы өске харыысалгалыг албан черлери-биле кады бо айтырыг талазы-биле ажылды чорудуп турар.
Бистиң корр.
«Шын» №7 2024 чылдың январь 31