РФ-тиң Президентизи Тывага кээп чорааш, федералдыг сайыттарның киржилгези-биле болган хуралга ТР-ниң Баштыңы В. Ховалыгның регионнуң социал-экономиктиг хөгжүлдезинге хамаарышкан эгелээшикиннерин долузу-биле деткээн. Хурал эгезинде-ле В. Путин Тывада чурттаар оран-сава тудуунуң сайзыралы шапкынчаанын демдеглээш, Россия Федерациязының эң-не аныяк регионнарының бирээзи болур Тывага ооң чугулазын ол айыткан.
Регионну сайзырадыр программаларже Тываны кииргеш, акшаландырыышкынны чогуур деңнелге хандырар дугайында даалганы федералдыг сайыттарга В. Путин берген.
«Чурттаар оран-сава тудуун ам-даа шапкынчыдып, социал объектилерни көвүдедир тудуп, чурттаарынга таарымчалыг байдалдарны чонга тургузар» – деп, Владимир Путин чугаалаан.
ТР-ниң Баштыңы Владислав Ховалыг тудуг адыры республиканың экономиктиг хөгжүлдезинге улуг идиг дээрзин демдеглээш, РФ-тиң Президентизинден чиигелделиг ипотека программазын деткиирин дилээн.
ТР-ниң тудуг сайыдының хүлээлгезин күүседип турар Артыш Кыргыс регионнуң удуртукчузунуң чиигелделиг ипотека программазын катап киирер дугайында бодалын деткээн.
«Совет үелерден эгелээш, Тывага шак мындыг дүшкүүрлүг тудуг ажылы турбаан. 2023 чылдан эгелээш-ле, тудуг адырында «шимчээшкин» 172 муң дөрбелчин метр чурттаар оран-сава тудуундан-на хамык ажыл эгелээн. А 2024 чылда көргүзүглер 195 муң дөрбелчин метр чедир өскен. Чурттаар оран-сава тудуунуң сайзырап эгелээнинге дыка хөй барымдаалар салдарлыг болган. Социал-экономиктиг хөгжүлдеге дээш ажылдап кылган янзы-бүрү программаларның деткимчези-биле тудуг адыры сайзырап эгелээн болгай. Чамдык тудуг материалдарын бодувус Тывада бүдүрүп эгелээн бис. Ол база кончуг эки чедиишкин-дир. 2023 чылдың сентябрьда ТР-ниң Баштыңы В.Путинниң деткимчези-биле 2 хуулуг чиигелделиг ипотека программазынче Тываны кииргениниң ачызында регионга тудуг ажылының шапкынчып, дыка хөй өг-бүлелер бажыңнанган. Ынчалза-даа чурттаар оран-сава ам-даа херек» – деп, Артыш Кыргыс чугаалаан.
Айдың ОНДАР белеткээн.
“Шын” №68 2024 чылдың сентябрь 7