Ноябрь 18-те найысылал Кызылда Культурлуг хөгжүлде төвүнге Степан Сарыг-оолдуң “Аңгыр-оолдуң тоожузу” деп чогаалынга үндезилеттинген долу метражтыг фильмниң баштайгы көрүлдези болуп эрткен. Көрүлдени чогаалчының төрүттүнген хүнүнде эрттиргени онзагай.
Кинону тырттырарынче ийи-ле ай үнген. Херек кырында шак ындыг төлевилелче бир чыл чартыктан хөй үе негеттинер дээрзин режиссёр Ролан Ооржак демдеглээн. Аңаа бүдүн Россиядан актерлар, өң болгаш үн каастаар специалистер шупту 150 ажыг кижи киришкен.
Ооң ажылдап келген төлевилелдериниң аразында эң-не улуг хемчээлдии бо дээрзин режиссер дыңнаткан. Россияның улуг хоорайларынга болур кино фестивальдарынга киржирин грантыны бижип тургаш-ла, планнап турганнар.
Амгы үеде кино Орёл хоорайга болуп эртер “Адалар болгаш уруглар” деп делегей чергелиг фестивальче эрте бергенин фильмниң сценаризи болгаш режиссёру Виталий Петров дыңнаткан. Өске фестивальдарга деңнээрге, ол элээн ылгалдыг болгаш тускай кылдыр санаттынар. Чогум-на фестиваль үезинде кинону тургускан режиссёрлар шупту чедип кээрге, сайгарылганы болгаш шилилгени кылгаш, шынар талазы-биле эки дээрзин бадыткаптарга, фестиваль ынчан доостур. Бо фестиваль элээн каш чадалардан тургустунган. Ында шииткекчилер болгаш эксперттер киноларны көргеш, аңгы-аңгы номинациялар аайы-биле түңнээш, январь айда тиилекчилерни шаңнаар.
“Эң-не кол чүүл – фестивальче эрте бээри. Ол кончуг нарын. Чүге дээрге фестивальга киржири-биле 100 хире кинону чагыгны киириптерге, чүгле 10–20 кинону шилип алыр. Кандыг-даа кино фестивалынче эртип алыры кончуг нарын. Бо кинонуң фестивальче эрте бергени дээрге-ле ооң деңнели бедик дээрзин көргүзүп турары ол. Кинофестивальдарга киржир дугайында чүүл грантыда база бижиттинген. Кандыг-бир фестивальче эрте бээр дээрзинге эгезинде-ле бүзүрелдиг турган бис” – деп, фильмниң сценаризи, режиссёру Виталий Петров чугаалаан.
Баштайгы көрүлде үезинде көрүкчүлер орус дылда бижиктерлиг белен кинону көргеннер. Төлевилел-биле ажыл апрельден октябрь айга чедир үргүлчүлээн. Кинону Өвүр кожуунга тырттырган. Октябрь 11-де “Найырал” кинотеатрынга хааглыг көрүлдези болуп турда, чалаткан аалчылар болгаш актёрлар улуг сонуургал-биле көргеннер.
“Аңгыр-оолдуң тоожузу” дугайында төлевилелдиң деткикчизи Президентиниң культурлуг эгелээшкиннер фондузу болган. Ону боттандырары-биле ТР-ниң Чазаа, Культура яамызы, Креативтиг үлетпүр школазы демнежип ажылдаан. Кинонуң күүсекчи продюсери Екатерина Зюзляева, режиссёрлары Виталий Петров база Ролан Ооржак.
Кол маадыр Аңгыр-оолдуң ролюн Каа-Хем суурдан Дидим-оол Даржай, ачазын Тываның алдарлыг артизи Орлан Оюн, авазын Шораана Ондар, кырган-авазын ойнаар-кыстар театрының артизи Уран Монгуш ойнаан.
Амгы үеде Москва хоорайда РФ-тиң Культура яамызында кинонуң прокат шынзылгазын манап турарлар.
Чыжыргана СААЯ.
Буян ООРЖАКТЫҢ тырттырган чуруктары.
"Шын" №89 2024 чылдың ноябрь 20