Чамдык ада-иелер ажы-төлге «чок» деп чугаалап шыдавас, ындыг чүүл чедиишкинниг кижи болурунга шаптыктаар. Бир эвес ажы-төлүвүс алызында барып, кижизиг, чедиишкинниг кижилер болзун деп бодаар болза, чамдык таварылгаларда «Чок» деп чугаалаары чугула. Бо удаада «Чок» деп чугаалаарының алды хуулгаазын аргазын көрээли.
Бирээде, «чок» депкен болзуңарза, бодалыңарны өскертпеңер. Турум болуңар. Ийиде, «Чок» дээрин кызыгаарлааш, «Ийе» дээрин көвүдедиңер. Үште, «Чок» дивейн, өске хевирин сүмелеңер. Дөрте, чаш уругнуң кичээнгейин өске солун чүүлдерже угландырыптыңар. Беште, байдалды өскертиптиңер. Чижээлээрге, чаш кижиниң хунаажып турган чүүлүн, ооң карааның уундан чайладып кааптыңар. Алдыда, чаш төлүңерниң аажы-чаңының дугайында чугаалажыңар. Шын алдынарын тайылбырлап тура, ынакшылды база ыяап-ла көргүзүңер.
Ынчалза-даа чүгле «Чок» дээш хорууру эвес, а деткиири база чугула дээрзин утпаалыңар.
Айдың ОНДАР.
“Шын” №85 2024 чылдың ноябрь 6