| Ноябрь 4 — Чоннуң чаңгыс деминиң хүнү |
Бо байырлалды 1612 чылда Кузьма Минин биле Дмитрий Пожарскийниң башталгазы-биле чоннуң ополчен шерии Москваны поляк эжелекчилерден хостаан төөгүлүг болуушкуннарга тураскаадып тургускан. Россияга ол хүннү 2005 чылдан тура калбаа-биле демдеглеп эгелээн.
Амгы үеде 190 ажыг аңгы-аңгы чоннарны мөөңнээн улуг күрүневис Россияда “Чоннуң чаңгыс деминиң хүнү” байырлалды чылдың-на демдеглеп эрттирип турар. Ооң ханы утказын чүгле чаңгыс хүн эвес, доктаамал сактып, чоннар аразында найыралды быжыктырар хемчеглерни удаа-дараа эрттирери чөптүг. Россияның хөй омак-сөөк чоннарының быжыг демнежилгезин, күштүг тура-соруун, Ада-чуртунга кызыгаар чок ынакшылын болгаш ону камгалаарынга кезээде беленин ооң аңгы-аңгы омак-сөөктүг чону бадыткап чоруур.
Тывада 100 ажыг омак-сөөктүг улустар чурттап, республиканы бир онзагай кылып турар. Тыва чоннуң патриотчу хөөнү республиканың сайзыралын шимчедир кол күжү болбушаан, нациялар болгаш шажын-чүдүлгелер аразында кол рольду ойнап турар. Багай нация чок, багай кижилер чоруур. Ынчангаш бот-боттарывыска камныг, хүндүткелдиг болурувус чугула. Чоннуң деми күштүг чуртту тургузар.
Бистиң корр.
Чурукту интернет четкизинден хоолгалаан.
“Шын” №42 2025 чылдың октябрь 30