Май 5-те Тываның алдарлыг журнализи, улустуң чогаалчызы, Россияның Хүндүлүг донору, Самагалдайның болгаш Кызыл хоорайның хүндүлүг хамаатызы Кара-Күске Күнзекович Чооду 90 харлаан.
Бо улуг өгбе журналист чогаалчының юбилейинге тураскааткан хемчеглер чер-черлерге, ылаңгыя уруглар библиотекаларынга хөй эрткилээн. Ылаңгыя К.-К.К. Чоодунуң өскен-төрээн чери Самагалдайга кончуг солун хемчеглерни чаңгыс чер чурттуглары организастап чоруткан. Ол ышкаш Республиканың К. Чуковский аттыг уругларның ном саңының ажылдакчылары чыл дургузунда юбилейлеп турар чогаалчыга тураскааткан республика чергелиг мөөрейлерни эрттиргеш, түңнел конференцияны база чогаалчының киржилгези-биле Самагалдайга дооскан.
Ол-ла юбилейлиг хемчеглерге улай Тес-Хемниң Белдир-Арыг суурунуң Культура бажыңының ажылдакчылары апрель 30-де К. Ондар аттыг тыва үндезин культура төвүнге Кара-Күске Күнзековичиниң шүлүктеринге бижиттинген ырлардан тургустунган кончуг солун концертти көргүскен. Аңаа Белдир-Арыгның Дамырак аттыг ыры-хөгжүм ансамбли дириг хөгжүм үделгелиг чараш оюн-көргүзүүн чыылганнарга бараалгаткан. Уруглар чогаалчызының чаштарга бижээн шүлүктерин бичии белдир-арыгжылар өткүт үннери-биле чыккыладыр бадырып турганнар.
90 харлап турар сураглыг чогаалчының допчу намдары колдуунда тыва журналистиканың хөгжүлдези-биле тудуш. Ынчангаш Тываның Журналистер эвилели тес-хемчилерге катчып, байырлыг хемчегге идепкейлиг киржип, тыва журналистиканың төөгүзүнге туруп көрбээн, бир дугаар “Тываның ховар журнализи” деп бижиктиг төөгүлүг кожааны Кара-Күске Чоодуга кедирген. ТЖЭ-ниң даргазы К.А. Куцевалов чон мурнунга үнүп келгеш: “Бистиң бо хүндүлүг хоочунувус Кара-Күске Күнзекович Тываның Журналистер эвилелинде эң-не хөй чыл – 56 чыл бактаап турар кежигүн болуп турар. Ынчангаш эвилелдиң баштаар чериниң шиитпири ёзугаар шак ындыг бижиктиг кожааны кедирип турарывыс бо. Хоочунувуска чоргаарланып, хар-назыны улгады берген-даа болза, ам-даа тергезин мунуп алган хоорайның ужу-кыдыынче дидими-биле халдып чоруп турарын көргеш, магадаар бис. Моон-даа соңгаар быжыг кадыкшылды, хөй чыл омак-сергек чоруурун Тываның бүгү журналистериниң мурнундан күзедивис!” – деп чугаалаарга, залда олурган чон туруп келгеш, адыш часкап деткээн.
Ол-ла байырлалга Кара-Күске Чоодунуң чарылбас өңнүү, кады Дөгээ даанче тергелиг үнер эжи, Тываның Журналистер эвилелиниң база бир хоочуну, май 9-та 80 харлаар Александр Бойдуевич Ооржакка журналистер байыр чедирип, хол белээн сунганнар.
/ Бистиң корр.
Чурукту ТЖЭ-ниң МАХ-та бөлүүнден алган.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...