Тыва Республиканың албан-дужаалынче болгаш Күрүне Думазының депутадын соңгуур хүнү – сентябрь 20-де болур. Тываның сайзыралы болгаш чоннуң амыдыралы, чоннуң боттарының шилилгезинден кол хамааржыр.
Эрткен беш чылда дыка эки хөгжүлдени Тыва Республиканың Чазаа кылган. Чоннуң амыдыралы экижээн, өртектерни өйлеп турар. Ынчангаш даргавыс Владислав Ховалыгны чонувус ийиги хуусаага соңгуп алыр боор деп идегээр-дир мен.
Ынчангаш Тыва Республиканың албан-дужаалынче кандидат Владислав Ховалыг даргавыска бо чагыгны «Шын» солун дамчыштыр киирип олур мен.
Эрткен 2025 чылдың апрель 3-те «Оочурлаар дээш шылай бердивис» деп материалды «Шын» солунче бижээн мен. «Шын» солуннуң редакциязы мээң айтырыымга харыылаары-биле чогуур албан черинге четкен. «Чедер» санаторий күрүнеге хамаарышпас хууда албан чери деп, «Чедерниң» удуртулгазының берген харыызы ол болган. Путевка алыры-биле 2-3 чыл оочурлап турар бис. Инвалидтерге шыланчыг-дыр.
"Серебрянка" санаторийде инвалидтер, хоочуннар сыңышпайн турары-биле, эмнээшкинге таарышпайн турар дээш, үндүр бижиптер таварылгалар хөй. Чижээлээрге, декабрь айда Россия Федерациязының улус өөредилгезиниң тергиини 90 харлыг башкыны хан базыышкыны улуг дээш, үндүр бижипти. Ол башкының ханының базыышкыны сагышсыралдан улам улгаткан.
«Идепкейлиг узун назын» деп программаны Чазак ажылдап кылгаш, улуг назылыгларже кичээнгейни салып турар-дыр. Чүге ону сагывазыл? Совет үеде күрүнеге кадыывыс кошкадыр ажылдап чораан бис. Ам кымга-даа херек чок болганывыс ол бе?
Ынчангаш инвалидтер болгаш чажындан инвалид ажы-төлге «Чедер» курортка эмнедир дыштаныр арганы даргавыс Владислав Ховалыгга болгаш Тыва Республиканың Социал фондузунуң даргазы Часкал Дараага идегеп, мону черле эде көөрүн солун дамчыштыр идегеп манап арттывыс.
/ Раиса МОНГУШ, «Шын» солуннуң мөгейикчизи.
Кызыл хоорай.
“Шын” №25 2026 чылдың июль 2