Тыва Республиканың тугунуң хүнүн тургузар дугайында дилегни Тываның Баштыңы Владислав Ховалыгның адынга аныяктарның “Тываның буянныг чүректери” шимчээшкинниң активчилери 2023 чылда киирген. ТР-ниң Баштыңының чанында Күрүнениң сүлделериниң айтырыгларының талазы-биле комиссияның кежигүннери болгаш республиканың хөй-ниитилели аныяктарның эгелээшкинин калбаа-биле чугаалашкан соонда, 2023 чылдың май 2-де Тываның Чазааның кежигүннери сентябрь 17-ниң хүнүн Тыва Республиканың Тугунуң хүнү кылдыр доктаадыр дугайында хоойлу төлевилелин ТР-ниң Дээди Хуралынга саналдап киирер деп шиитпирни хүлээп алган.
Тыва Республиканың Тугунуң хүнүн тургузар дугайында саналды киирген “Тываның буянныг чүректери” шимчээшкинниң активчилери ол хүннү февраль 8-тиң хүнү кылдыр саналдааннар. Тываның кол күрүне сүлдези тукту республиканың Дээди Хуралы 1992 чылдың сентябрь 17-де тургузуп бадылаанын барымдаалап, чогум-на сентябрь 17-ни Тыва Республиканың Тугунуң хүнү кылдыр хоойлу төлевилелинге киирген.
Тыва Республиканың Дээди Хуралының депутаттары ТР-ниң Чазааның саналдап киирген Тываның Тугунуң хүнүнүң дугайында хоойлу төлевилелин деткип, сентябрь 17-ни Тыва Республиканың Тугунуң хүнү кылдыр доктаадыр шиитпирни хүлээп алган.
Россияның күрүне Тугунуң хүнү август 22-де ол тукту эртен эрте байырлыг байдалга киискидип көдүрүп турар. Тываның Тугунуң хүнүн база сентябрь 17-де эртенги даң хаяазынга киискидип көдүрери чаагай чаңчыл апаар боор.
Тывада ам үш күрүне байырлалдары бар. Республика хүнү – август 15, Тыва Республиканың Конституциязының хүнү – май 6, Тыва Республиканың Тугунуң хүнү – сентябрь 17.
Бо байырлалдар Тываның чонунуң сүлде-сүзүү бедииринге, төрээн чуртунга ынак болгаш хүндүткелдиг болурунга, ооң төөгүзүн билип алырынга, аныяк салгалды патриотчу сеткил-хөөннүг, улуг салгалгалдарның үүле-херектеринге төлептиг кылдыр кижизидип өстүреринге салдарлыг болур. Ынчангаш Тываның күрүне байырлалдарын республикага калбаа-биле демдеглеп эрттирери, оларның ужур-утказын чонга тайылбырлаары кончуг чугула. Чүге дээрге Республика хүнү, Тыва Республиканың Конституциязының хүнү, Тыва Республиканың Тугунуң хүнү байырлалдар – чоннуң сүлде-сүзүүнүң илередиишкини.
Ш. Моңгуш.
"Шын" №70 2023 чылдың сентябрь 16