Частың болгаш Күш-ажылдың байырлалы Май 1-де В.С. Биче-оол аттыг "Хүреш" стадионунга чаңчыл езугаар тыва чоннуң ынак оюну хүреш бо удаада деңзи аайы-биле кончуг солун, бедик көдүрлүүшкүннүг болуп эрткен.
Маргылдааны ТР-ниң Спорт яамызының Национал спорт сайзырадыр талазы-биле төвү база Тыва хүреш чөвүлелиниң удуртулгазы 4 аңгы килге (65, 75, 85, 85 килден өрү) эрттирерин шиитпирлээннер. Маргылдааның кол сорулга- зы — Россияның Президентизи В.В. Путинниң национал спортту (этноспортту) сайзырадыр төлевилелин боттандырары.
Маргылдаа үезинде Россияның, Европаның сумо хүрешке база Якут (Саха) Хапсагай хүрешке бодунуң килинге чемпион, Өвүр кожууннуң мөгези Айдыс Монгуш 75 килге үлегерлиг, чараш хүрешти көргүскен. Айдыс хүндүлээчел биче сеткилдии, чараш девии, тоолда мөгелер дег күш-шыдалдыг овур-хевири, эр соруктуу база тиилелгеже чүткүлдүү-биле көрүкчүлерниң база мөге эштериниң сонуургалын чаалап алган.
Маргылдааның түңнелинде килдер аайы-биле дараазында мөгелер шаңналдыг черлерже кирген: 65 килге 50 мөгениң хүрежинден шылгараан 4 мөге: 1-ги черде Дайза Ондар (Сүт-Хөл), 2 дугаарында Давид Сагды (Эрзин), 3–4-кү черлерде Кайрат Доктуут (Тес-Хем) биле Айдыс Оюн (Улуг-Хем); 75 килге 55 мөгениң хүрежинге 1-ги черни Россияның сумо хүрежинге спорт мастери Айдыс Монгуш (Өвүр) чаалап алган, 2 дугаарында хостуг хүрешке Россияның спорт мастери Чаян Монгуш (Барыын-Хемчик), 3–4-кү черлерде Буян Саая (Барыын-Хемчик) биле Бады-Эртине Даңгыт (Эрзин); 85 килге 40 мөгениң хүрежинге 1-ги черде — Хүрегечи-Мерген Сундуй-оол (Улуг-Хем), 2-ги черде — Буян Чылбак (Сүт-Хөл), 3–4-кү черлерде Айдыс Даржаа (Чаа-Хөл) биле Айыс Сарыглар (Сүт-Хөл); 85 килден өрү 60 мөгениң хүрежинге 1-ги черге Түметей Ширижик (Сүт-Хөл) шүүлген, 2 дугаарында сумо хүрешке Россияның спорт мастери Мерген Монгуш (Таңды), 3–4-кү черде Арзылаң мөге Мөңге-Эртине Куулар (Чөөн-Хемчик) биле Начын мөге Начын Монгуш (Чөөн-Хемчик) төлептиг болганнар.
Алексей ЧАМБАЛ-ООЛ, спорттуң хоочуну.
Юрий ДАРБААНЫҢ тырттырган чуруктары.
"Шын" №17 2025 чылдың май 8