Чону-биле кежиин үлешкен

Чоокта чаа Чадаананың Бора-Булакка республика чергелиг аът чарыжынга Улуг-Хем кожууннуң чүгүрүк аъттары шаңналдыг черлерже кирген.

Улуг челер аъттар чарыжынга Ай-Демир, Айдыс Домбаа адашкыларның аъды тиилээн. Шаңналынга 1 аскыр, 29 кызырак аъттарны белек кылдыр алганнар.

Домбааларның өг-бүлези алган кежиин чону-биле үлежир сорулгалыг Торгалыг сумузунуң хөй ажы-төлдүг өг-бүлелеринге 5 кызыраан белек кылдыр сөңнээн. Кызырак алган өг-бүлелер өөрүшкүзүн болгаш четтиргенин Домбаа адашкыларга илереткеннер.

Тыва эр кижи чажындан эзер бажындан туттунуп өзер дээр болгай. Торгалыгның чүгүрүктер ээзинден улуг белек-сөңүн алган оолдар кызырактарын өстүрүп, чүгүрүктер санын өстүрер дээрзинге бүзүрел улуг.

Домбааларның өг-бүлезиниң чонунга чедирген буянныг үүлезиниң ачызында чүгүрүк малдары мооң-даа соңгаар чарыштарның бажынга салгын-хат дег халып кээп, тиилелге байзаларын удаа-дараа чаалаар болзун деп чаңгыс чер чурттуглары йөрээлин салган.

Улуг-Хем кожууннуң медээзи-биле