Чаа өөредилге чылы эгелээриниң мурнуу чарыында «Школага белеткениринге дузалаш!» ачы-дуза акциязын эрттирип, социал байдалы чединмес өг-бүлелерниң өөреникчи назылыг ажы-төлүнге школаже өөренип киреринге дузалажыры, ном-дептер, школачы идик-хептен эгелээш, өөредилгеге херек өске-даа чүүлдерни садып бээри дээш өске-даа материалдыг дузаны көргүзери Тываның чурттакчы чонунуң чаагай чаңчылы апарган.
«Школага белеткениринге дузалаш!» ачы-дуза акциязын организастап эрттирериниң аргалары база тодаргай апарган. Школаже өөренип киреринге материалдыг дуза херек уруг-дарыглыг өг-бүлелерниң дугайында хоорайларда болгаш кожууннарда социал төптерден билип ап болур. А сумуларда кайы өг-бүлениң ажы-төлүнге деткимче херегин тус черниң чурттакчылары эки билир, ынчангаш чаңгыс чер чурттугларының азы дөргүл-төрелдериниң школачы ажы-төлүнге ачы-дузаны акцияның киржикчилери боттары туда чедирип турар.
Школаже өөренип киреринге дуза херек уруг-дарыглыг өг-бүлелерниң дугайында медээлер социал дуза төптеринде бар. Албан-организацияларның коллективтери «Школага белеткениринге дузалаш!» ачы-дуза акциязынга социал деткимче төптери дамчыштыр киржип турар. Оларның садып эккеп берген идик-хевин, ном-дептерни социал деткимче төптери дуза херек өөреникчи ажы-төлге дамчыдып бээр.
Республиканың культура ажылдакчылары Ростислав Кенденбиль аттыг уран чүүл школазының өөреникчилеринге ачы-дуза деткимчезин көргүзер деп шиитпирлээннер. Социал байдалы чединмес өг-бүлелерден бо школага өөренир ажы-төлге ном-дептерни, кыдырааштарны болгаш идик-хепти культура ажылдакчыларының чыгган акшазы-биле садып бээр. Социал деткимче херек уруглар, оолдарның саны бо школада чээрби ажыг.
«Саян» ансамблиниң коллективи боттарының ажылдакчыларының уруг-дарыынга школага белеткениринге дузалаар деп шиитпирлээн. Чүге дээрге бо ансамбльде ажы-төлү хөй, социал деткимче херек өг-бүлелер база бар. А культура ажылдакчыларының акша-шалыңы ындыг-ла кончуг хөй эвес дээрзи билдингир-ле болгай.
Тываның культура албан черлери бо чылын «Школага белеткениринге дузалаш!» ачы-дуза акциязынга организастыг киржип турарын демдеглээр апаар. Ачы-дуза херек өг-бүлелерни Культура яамызы баш бурунгаар тодарадып, кайы өг-бүлениң уругларынга кандыг дуза херегин илереткен. Тываның күрүне филармониязының, Кызылдың уран чүүл колледжизиниң, К. Чуковский аттыг бичии уруглар библиотеказының дээш өске-даа культура албан черлериниң коллективтери ачы-дуза чедиреринге акша-хөреңгини эки туразы-биле чыгганнар. Культура ажылдакчыларының элээн хөй өг-бүлелериниң ажы-төлү школага белеткениринге дузаны алганнар. Культура ажылдакчылары ук ачы-дуза акциязын уламчылап турар.
ТР-ниң Дээди Хуралының депутады, Тываның күрүне университединиң ректору Ольга Хомушку «Школага белеткениринге дузалаш!» ачы-дуза акциязынга чылдың-на идепкейлиг киржип келген. Бо чылгы өөредилге чылынга уткуштур хөй уруг-дарыглыг Чойгана Сат, Алёна Хертек оларның өг-бүлелеринге ачы-дузаны чедирип, өөредилгеге херек ном-дептерни, кыдырааштарны дээш өске-даа чүүлдерни садып берген.
Тыва улустуң «Чону – чоорган, хөйү – хөйлең» деп үлегер домаа бар.
«Школага белеткениринге дузалаш!» ачы-дуза акция үезинде чүгле чединмес социал байдалдыг өг-бүлелерниң ажы-төлүнге эвес, а школаларга болгаш уругларның өөредилге черлеринге база дузаны чедирип турар. Каа-Хем кожуунда Сергей Петрович биле Анастасия Николаевна Елькиннерниң өг-бүлези эге класстарга бойдус болгаш англи дыл эртемнериниң өөредилге номнары-биле деткимчени көргүскен. Ол өөредилге номнарын кожууннуң школаларынга болгаш Каа-Хем кожууннуң Өг-бүлелерге болгаш уругларга социал дуза төвүнге аппарып чедирген.
«Буян чедирген кижиниң бодунга буян муң катап эгелип кээр» деп чугаа бар. «Школага белеткениринге дузалаш!» ачы-дуза акциязы Тывада уламчылап турар.
Ш. КҮЖҮГЕТ.
Чурукту социал четкиден хоолгалаан.
“Шын” №64 2024 чылдың август 24