Кызыл хоорайның чагыргазы МАХ капсырылгазында “Кызылда дежурный” деп хоорайжылар-биле дорт харылзаа тудар каналды ажыткан. Ук шөлчүгеш хоорайның нарын айтырыгларын дүргени-биле шиитпирлээр база Тываның найысылалының келир үезин демнежип сайгарар сорулга-биле тургустунган. Ам чурттакчы бүрүзү чаагайжыдылганың чедер-четпес талаларын дыңнадырындан аңгыда, хоорайны сайзырадырынга бодунуң санал-оналын база киирер аргалыг.
“Кызылда дежурный” деп каналга кызылчыларның буянныг ажыл-ижиниң дугайында, чараш черлерниң чуруктары болгаш төөгүлери база солун эки медээлер-биле үлежип болур. Ол ышкаш тус черниң чурттакчылары бистиң хоорайывыс амгы үеге дүгжүп турар, аянныг, эптиг болзун дээш чүнү кылза эки дээрзин сүмелээн санал-оналы-биле база үлежир аргалыг. Ажылдавайн турар сайгылгаан, орукта оңгар азы аштаттынмаан херим дээн ышкаш кандыг-ла-бир нарын айтырыг дугайында дыңнадып база болур. Хоорай чагыргазы ол бүгүнү кичээнгей чок арттырбазын дыңнаткан.
Кижи бүрүзү найысылал Кызылдың дугайында чаа медээлерни эрттирбейн, көрүп, номчуп, чугаалажылгага киржир эргелиг. Шак ындыг сорулга-биле МАХ капсырылгазында каналче дараазында айтыг таварыштыр коштунуп алыр: https://max.ru/channel_kyzyl100. Кижи бүрүзү бодунуң кыйгырыын чогуур бижик адаанга санал-онал кылдыр арттырып болур.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn