Тываның чурттакчыларының чуртталга-коммунал ажыл-агый бүдүрүлгелеринге бөгүнде өрези 163 хире сая рубль четкен. 102 сая рубль – соок суг хандырылгазы, 15 хире сая рубль – чылыг болгаш изиг суг дээш, 26 сая ажыы – бокту үндүр сөөрткени дээш.
Чылдың эгезинден бээр коммунал албаннар республиканың судтарынче ниитизи-биле 29,6 сая рубль түңнүг өрелиг кижилерже 1200 негелде билдириишкиннерни киирген. 18,5 сая рубль өрени тырткан.
Чуртталга-коммунал ажыл-агый яамызының тускай мергежилдиглери коммунал төлевирлерни үе шаанда төлеп алыр кылдыр хереглекчилерге ажыктыг элээн каш арга-сүмелерни ажылдап кылган.
Өрелер чыглы бербес кылдыр, телефонунда азы планшединде календарьга сагындырып турар почта дыңнадыын тургустуруп алыр.
База бир дээштиг арга – банкыларның боттарының капсырылгаларында саналдап турары автотөлевирлер. Ону салдырып алырга, чуртталга-коммунал ажыл-агый чарыгдалдарын, чырыкты, телефонда интернетти ажыглаанын боду-ла ала чайгаар төлеп турар болур. База бир арга – акша-хөреңгизи бар болза, ийи-үш ай бурунгаар коммунал ачы-дузаларны төлеп алыры.
Оон аңгыда, Чуртталга-коммунал ажыл-агый яамызы коммунал курлавырлар санаар дериг-херекселдерниң ажыктыын сагындырган: сугну шын ажыглаанының төлевири доктааткан нормадан элээн эвээш болурундан, камналгалыг.