Чоокта чаа Эрзин кожуунга ыдыктыг XIII Күнделиң Ринпоче башкы кээп чораан. Кожууннуң удуртулгазы улуг башкыны дыка эки уткуп хүлээп алган. Кожууннуң Төлээлекчилер хуралының даргазы Игорь Кыргысович Ламажап, чагырга даргазы Дүрген Николаевич Сагды баштаан кожууннуң чону чыглып келген. Башкының номналының мурнунда солун концертти культура ажылдакчылары бараалгаткан. Улуг назынныг хоочуннарга изиг шайны удаа-дараа эккеп берип турду.
Эрзин кожууннуң чурттакчы чону дыка-ла чурумнуг-дур деп көрдүм. Башкының чанынче чыскаалып алгаш, чурумнуг бардылар. Ол хүн чон болза-даа хөй болду.
Мөрен суурдан кырганнарны школа директору Ольга Михайловна школаның Газель машиназынга аай-дедир халас чедирди. Улуг назылыг хоочуннар ол дээш дыка-ла өөрүп турду.
Күнделиң Ринпоче башкының өөредиин дыка эки билип, хүлээп алдывыс. Эрзин кожууннуң бүгү чонунуң мурнундан башкыга четтиргенивисти илереттим.
Чечекмаа САДИ, ТР-ниң алдарлыг ажылдакчызы.
Эрзин кожун, Мөрен суур.
"Шын" №57 2024 чылдың июль 31