«Чылдың башкызы – 2023»: түңнелдер

Апрель 3-тен 8-ке чедир найысылалга «Россияның чылдың башкызы – 2023» профессионал мергежил мөөрейиниң республика чадазы болуп эрткен. Аңаа 175 башкы боттарының профессионал мергежилин шылгап киришкеннер.

Түңнел кезээнге Улусчу чогаадылга бажыңынга башкылар зал долу каас-шиник шыгырт олурупканнар. Оларның арын-шырайында өөрүшкү чайыннаан, сценадан оларны алгап-мактаан ыр-шоор, чылыг-чымчак сөстер үзүк чокка куттулган. Кижи базар чер чок тергиин улуг байырлал болду.

Каа-Хемниң 2 дугаар школазының 10-гу клазының өөреникчизи Ника Монгуш база Кызылдың 15 дугаар лицейиниң 10-гу классчызы Михаил Покоянов мөөрейниң бүгү хемчеглериниң допчулалын белеткеп, чараш репортажты сценада улуг экранга көргүскен.

Ниитизи-биле 9 аңгы номинацияның тиилекчилерин болгаш шаңналдыг черлер алган башкыларын Дээди Хуралдың депутады Аяна Монгуш, өөредилге сайыдының оралакчылары уурук-сууруктап хүндүткел ёзулалын илередип, шаңналдарны тывыскан.

Шаңнал-мактал ёзулалының эң-не солун кезээ 1 сая рубльге болгаш «Чылдың башкызы – 2023» деп хүндүлүг атка Хову-Аксы школазының англи дыл башкызы Алдын-кыс Куулар төлептиг болган. А 500 муң рубльге болгаш «Чылдың кижизидикчизи – 2023» деп бедик чедиишкинге Кызылдың 3 дугаар уруглар садының логопеди Татьяна Галкина тергиидээн.

– Мөөрейге киржири меңээ солун болду. Сөөлгү арткан 5 киржикчи – шупту тергииннерниң тергииннери, олар – тиилелгеге төлептиг башкылар. Кымның тиилеп үнерин кайывыс-даа билбес турдувус. Тиилекчи деп шаңналды хүлээп алыры меңээ берге болду. Чүге дизе башкылар шупту шыырак, кижи бүрүзү дээди шаңналга төлептиг. Мурнумда – Россия. Шаңнал кылдыр алган акшам-биле Тываны Россияга чогуур деңнелге төлээлээр дээш, эки белеткенир сорулгалыг мен. Мени тиилекчи кылдыр шилип алган шииткекчилерниң бүзүрелин ышкынмас дээш бүгү күжүм-биле кызып киржир ужурлуг мен – деп, Чылдың кижизидикчизи болган Татьяна Галкина чугаалады.

Чылдың башкызының шаңналын тыпсып тура, Тываның Чазак Даргазы Владислав Ховалыг Башкының болгаш дагдыныкчының чылында башкыларның салым-чаяанын болгаш күш-ажылын үнелээр сорулга-биле мөөрейниң эрге-байдалын бедиткен дугайын дыңнаткан. Мөөрейниң төөгүзүнде 1 сая рубль-биле тиилекчини шаңнап турар бир дугаар таварылга дээрзин ол демдеглээн. Тиилекчилерге болгаш шаңналдыг черлерге төлептиг болган башкыларга Владислав Ховалыг байыр чедирип, чедиишкиннерни күзээн.

Аныяк башкы номинациязынга Кызылдың 8 дугаар школазының физика башкызы Сайзана Алдын-оол, төрээн, ооң иштинде орус, дыл башкыларының бүгү Россия чергелиг мастер-клазының тергиининге Мугур-Аксының 1 дугаар школазының эге класстар башкызы Хураганмай Шыдыраа, Чылдың директорунга Сарыг-Септиң 1 дугаар школазының удуртукчузу Марина Радченко, Чылдың тергиин эр башкызынга Тоора-Хем школазының ОБЖ башкызы Херел Монгуш, психолог башкы мөөрейинге «Сайзырал» төвүнүң психолог башкызы Ульяна Монгуш, «Кижини кижизидери» мөөрейинге Шагаан-Арыгның 1 дугааар школазының немелде өөредилге башкызы Саяна Тарый, Чылдың мастеринге Тываның көдээ ажыл-агый техникумунуң тускай эртемнер башкызы Людмила Кучковская төлептиг болганнар.
Номинацияларның тергииннери Тываның өмүнээзинден Россия мөөрейинге күзүн киржир.

/Алиса ДОНГАК.

"Шын" №26 2023 чылдың апрель 12

#Шынсолун #Тыва #ЧылдыңБашкызы #Өөредилге #Мөөрей