Тываның чурттакчы чону болгаш организациялары чырык болгаш чылыг хандырылгазы дээш 1,3 млрд өрелиг. Регионалдыг Одалга яамызы Чазак хуралынга ындыг сан-чурагайны медеглээн.
Чырык энергиязы дээш ниити өре 582 сая рубль четкен, ооң:
- чурттакчы чоннуу – 297 сая рубль;
- федералдыг албан черлернии – 4 сая рубль;
- республика албан черлернии – 25 сая рубль;
- муниципалдыг албан черлернии – 21 сая рубль;
- өске-даа хереглекчилернии – 234 сая рубль.
Чылыг энергиязы дээш чоннуң болгаш юридиктиг черлерниң өрези 786 сая рубль четкен, ооң:
- 672 сая рубли – чурттакчы чоннуң;
- 23 сая рубли – федералдыг албан черлериниң;
- 12 сая рубли – республика албан черлериниң;
- 32 сая рубли – муниципалдыг албан черлериниң;
- 47 сая рубли – өске хереглекчилерниң.
Келир кышты канчаар ажып эрттеривис хереглекчилерниң ачы-дуза төлевирлерин үе-шаанда төлеп турарындан дыка хамааржырын сагындыраал. Эрткен чылдың бо үезинге деңнээрге, ниити өре 10 хуу, азы 150 сая рубльга эвээжээнин энергетиктер демдеглээн. Байдал чүгээртээн-даа болза, Тываның организацияларындан болгаш чонундан өрелерин дүрген төлээрин дилээн.
Ынчангаш курлавыр хандырылга организациялары коммунал ачы-дуза өрелерин үзүктеп төлээр арганы күзелдиг улуска сүмелеп турар. Чыглы берген өрени үзүктеп төлээри дээрге: шупту бар түңнү төлепки дег айларынга чара хуваагаш, ол үе дургузунда кезектеп дуглаарын дугуржур. Ону таптыг билип алыр дизе, курлавыр хандырылга организациязынга чедип тайылбырлаткаш, олар-биле чогуур дугуржулганы чарар.
ТР-ниң Чазааның парлалга албаны.
«Шын» №66 2024 чылдың август 31