Cураглыг композиторнуң ырыларын күүсеткен

Тываның А. С. Пушкин аттыг национал ном саңынга республиканың сураглыг композитору, чонга билдингир апарган, дыка хөй ырыларның автору Хүреш-оол Дамбаның 80 харлаанынга тураскааткан хемчегни эрттиргенин ном саңы дыңнаткан.

Хемчегге Тываның «Чечек-Саян» ансамблиниң алдарлыг хоочуннары, эштери, өөреникчилери Х. Дамбаның бижээн ырыларын күүсетпишаан, композиторнуӊ дугайында чылыг-чымчак сактыышкыннарны чугаалааннар.

Композиторнуң допчу намдары-биле Тываныӊ алдарлыг артизи Татьяна Соржу таныштырган. Ыраажылар «Аныяк кадарчылар дугайында ыры», «Тыва кызы», «Чогаадыкчы ажылчын чон бис», «Шолбаным сен», «Ынакшыл чокта, чуртталга чок» дээш, оон-даа өске ырыларны күүсеткеннер.

Кызылдың 9 дугаар школаның өөреникчилери Ангел Оюн (2 класс), Денис Ооржак (6 харлыг) «Элдеппей» деп ырыны күүсеткеннер.

Сураглыг композиторнуң юбилейинге тураскааткан «Ыры – чалгыным, күжүм, чоргааралым» деп номнар делгелгезинде Х. Дамбаныӊ дугайында бижиттинген ажылдары, ажылдап чораан үезинде чуруктары, база хол-биле бижээн ноталары салдынган.

Ноталарда ооӊ чонга билдингир болу берген ырыларыныӊ аялгалары «Мээӊ Тывам», «Авам, авам, ынак авам», «Кара-кара карактар» дээш, оон-даа өскелерин көрүп болур.

Хүреш-оол Кара-Саловичиниӊ хол-биле бижээн ноталары тураскаал номнар килдизинде шыгжаттынган.