Тыва Республиканың алдарлыг чогаалчызы, Чогаалчылар эвилелиниң кежигүнү, уруглар чогаалчызы Эргеп Монгуштуң 100 харлаанынга тураскааткан, чогаалчының «Өдүгенде чайлаг» деп номунга Кызыл-Чыраа ортумак школазының 7 – 8 класстарының өөреникчилеринге номчулга конференциязын эрттирген.
Номчулга конференциязын класстан дашкаар ажылдарның бир хевири кылдыр школаның библиотекары база тыва дыл болгаш чогаал башкылары ажылды чорудуп турар.
Конференция үезинде өөреникчи бүрүзү айтырыгларга харыылап, башкылары уругларны шын харыыже угландырып, солун эрттирген.
Өөреникчилер боттарының шинчилелдериниң түңнелдерин таныштырар аргалыг болган. Таныштырылга уругларның дыл-домаан сайзырадырынга, бодалдарын илередип билиринге чаңчыктырар. Ол ышкаш уругларның чогаалга сонуургалын оттуруп, шилип алган чогаалын бодамчалыг, хандыкшылдыг номчуурунга өөредиглиг болган.
7-ги класстың өөреникчизи Ээлдек Сагаачы сумунуң ном саңының тергиин номчукчузу. Ол конференцияның түңнелин эштеринге билдингир болгаш чедингир чугаалап берген.
Конференцияга сайгарган чогаал уругларның сагыш-сеткилин байыдар, чараш чүүлге ынак болурунга, ону үнелеп билиринге чаңчыктырар.
Уругларның харыысалгазын демдеглевес арга чок. Олар өске эштеринге үлегер-чижек болур болгаш эстетиктиг кижизидилгеге улуг салдарны чедирер.
Тес-Хем кожууннуң Кызыл-Чыраа ортумак школазының өөреникчилери сумунуң ном саңында идепкейлиг номчуттунуп кээп турарлар. Школаның библиотекары С.С. Шыырап-биле база сырый харылзаалыг ажылдап турар.
/ Долаана ДАНДАА,
Ак-Эрик сумунуң ном саңының библиотекары.
«Өдүгенде чайлаг»
16 декабря 2022
107