Бо удаада ол болза 21-ги дугаарлыг фестиваль ужуражылгазы болур, аңаа бүгү делегейден аалчылар чыглыр. Тываның Баштыңы Владислав Ховалыгның шиитпириниң ачызында фестиваль дагын катап ажылдап эгелээн.
Бо хүннерде фестивальды эрттирериниң талазы-биле оргкомитет тургустунган. Организакчыларның дыңнатканы-биле алырга, бо эртер болуушкуннуң болур чери өскерлиш чок. Бо чылгы ХХI фестиваль июль 9-11 хүннеринде Чадаана хоорайга болуп эртер.
2019 чылда болуп эрткен «Үстүү-Хүрээ» Россияның 83 хоорайындан база делегейниң сес чуртундан 937 аалчыны чыгган. Фестивальдың эгелекчизи Игорь Дүлүш ынчан хөгжүм шуулганының эрттирилгезинде чамдык шаптараазыннар тыптып келген, чаартынылга херек апарган дээрзин чарлаан. «Бир талазында, биске фестивальдың сүлде-соруун кадагалап арттырары чугула, ынчалзажок сайзыралдың чаа-чаа чадаларынче депшиири эргежок чугула» деп, Игорь Дүлүш ынчан чугаалаан.
Дириг хөгжүмнүң болгаш чүдүлгениң «Үстүү-Хүрээ» бүгү-делегей фестивалы эң-не баштай 1999 чылда эрткен. Ооң кол сорулгазы – Чадаана хоорайда Үстүү-Хүрээни катап тургузары болган. Бо чылдарның дургузунда аңаа алды муң ажыг киржикчилер болгаш делегейниң 20 ажыг чурттарындан аалчылар келген. Ооң шөлдеринге кезээде янзы-бүрү хөгжүм куттулуп турган – классиктиг аас-чогаал хөгжүмүнден эгелээш, амгы үениң хөгжүм угланыышкыннарынга чедир. Маңаа фонограмма ажыглап болбас.
Чуруктарны интернет четкизинден алган.