Даалгаларны боттандырарынга улуг идиг

ТР-ниң Баштыңының Айыткалынга хамаарыштыр Тес-Хем кожууннуң чагырга даргазының социал политика талазы-биле оралакчызы Чейнеш Каржал бодалын илереткен:

- Чазак Баштыңының бо чылгы Айыткалын ооң мурнунда чылдарга көөрде, тускай деп санап тур мен. Кожуун даргаларын болгаш оларның оралакчыларын килдистер эргелекчилерин чалап алганы база бир онзагай болду. Чүге дээрге удуртур черде ажылдап чоруур улус Чазак Баштыңының салып турар даалгаларын боттары дыңнап алырга, ону күүседир дугайында шиитпир хүлээп, планнарны боттандырып эгелээринге улуг идиг болур деп бодаар мен.
Оон ыңай хөй-ниити организацияларының төлээлерин, кожууннарда чон аразында ат-алдарлыг, хүндүткелдиг кижилерни чалааш, оларның-биле кады демнежип ажылдаарынче кыйгырганын сонуургадым.
Эң-не кол чүүл – келир чылды чоннуң кады демнежилгезиниң дугайында Тывага чарлааны кончуг шын деп санап тур мен. Чүге дээрге тускай шериг операциязында киржип турар оолдарны, оларның өг-бүлелеринге материалдыг-даа, моральдыг-даа деткимче көргүзеринге чоннуң демниг болуру, кады ажылдаары күзенчиг. Ол айтырыгны дыка чугула деп санап тур мен.


А.Ондар белеткээн.