Республиканың Чазааның ээлчеглиг Аппарат хуралынга корум-чурум, айыыл чок чорук, өртке удур профилактика дээш оон-даа өске айтырыгларны сайгарган. Ведомстволарның удуртукчуларынга эрткен неделяның болуушкуннарының дугайында медээлерни таныштырган. Регионнуң Баштыңы Владислав Ховалыг чагырга даргаларынга тодаргай даалгаларны берген.
Иштики херектер яамызының ажылдакчылары дыңнадыгны кылган. Отчёттуг үениң дургузунда хоойлуга удур наркотиктиг бүдүмелдер садып-саарары-биле холбашкан 27 административтиг кем-херек үүлгедиишкиннерин илереткен, 18 кеземче херээн оттурган. Хоойлуга удур садыглажылгадан 12 ажыг килограмм наркотиктиг бүдүмелди хавырган.
«Республикага март 27-де Лицензия албаны-биле кады «Корум-чурум» деп профилактиктиг ажылды чоруткан. Хемчег үезинде арагага удур хоойлужудулганың 19 хажыдыышкынын илередип, чогуур саавырларны долдурган. Хоойлуга удур садыглажылгадан 200 ажыг литр хоруглуг спирттиг суксуннарны хавырган» — деп, иштики херектер сайыды Юрий Завьялов илеткээн.
Республиканың оруктарынга 58 орук озал-ондаа болган, оларның бежи кемдээшкиннерлиг, ийизи өлүмнүг болган дээрзин сайыт дыңнаткан: “Оруктуң айыыл чок чоруун хандырары-биле 78 чолаачыга пассажирлер сөөртүлгезиниң дүрүмнерин хажытканы дээш, чолаачы эргези чок азы ындыг эргезин казыткан улус машина башкарып чорааны дээш, 141 кижиге, чолаачы эргезин казыткан азы эргези чок кижиге машиназын башкартканы дээш, 31 таварылгада – ниитизи-биле 1909 административтиг протоколду долдурган. 80 эзирик чолаачыны туткан, катап база эзирик машина башкарып чорааны дээш, 14 кеземче херээн оттурган”.
Отчёттуг үениң дургузунда 31 бажыңга өрт болганын, аңаа амы-тынындан чарылган айыыл-халап демдеглеттинмээнин, бир кижи кемдээнин Онза байдалдар яамызының төлээзи дыңнаткан. Арга-арыг өрттери Тываның дөрт кожуунунда көвүдээни демдеглеттинген.
“Бойдустуң өрттериниң айыылын эвээжедири-биле тус чер чагырыкчыларынга өртке удур тускай чурумну киирерин сүмелеп турар. Амгы үеде Бай-Тайга, Барыын-Хемчик, Чөөн-Хемчик бо үш кожуунда өртке удур тускай чурумну киирген” — деп, ОБЯ-ның Тывада эргелелиниң начальнигиниң бирги оралакчызы Владимир Соднам дыңнаткан.
Тываның арга-арыг ажыл-агыйы болгаш бойдус ажыглалының сайыды Григорий Ондар республикада арга-арыгга дөрт өрттүң шуптузу кижилерниң буруузундан болганын демдеглээн: «Арга-арыг өрттеринге буруулуг кижилерни тодарадыры-биле Иштики херектер албанынче болгаш Россияның Онза байдалдар яамызының регионалдыг эргелелиниң тус-тус салбырларынче үш дыңнадыгны киирген бис. Сүт-Хөлге өртке хамаарыштыр база дыңнадыгларны кииргеш, буруулуг кижилерни тодарадыр бис. Арга-арыг яамызы өрттенген черлер кымга хамааржырын тодарадырын чагырга даргаларынга дааскан. Өрттерин өжүреринге бүгү чарыгдалдарны ол черлерниң ээлеринге шүүгү таварыштыр онаар».
Аппарат хуралынга регионнуң Баштыңы Владислав Ховалыг чедимчези кошкак өг-бүлелер болгаш “айыыл бөлүүнде” кижилер-биле профилактиктиг ажылды күштелдирерин дааскан.
«Барыын-Хемчик, Каа-Хем, Улуг-Хем, Бай-Тайга кожууннарының база Кызыл хоорайның чагыргазынга чедимчези кошкак өг-бүлелер, учётта турар кижилер болгаш арагалап турар хамаатылар-биле адрестиг профилактиктиг ажылды бир неделя дургузунда чорударын даастым. Оларның чурттап турар байдалын шинчилеп, актыны долдурар. Участок шагдаалары болгаш хөй-ниитиниң эки турачы дружиналарының кежигүннери-биле кады бажыңнарны кезип хынаар»— деп, Тываның Баштыңы чугаалаан.
Бистиң корр.
Чурукту ТР-ниң Чазааның парлалга албанындан алган.
“Шын” №13 2026 чылдың апрель 9