Дага — чедиишкинниң болгаш аас-кежиктиң демдээ. Бажыңга даганы азып алырга, ооң чурттакчыларынга эки салдарлыг, аас-кежик эккээр.
Даганың хуулгаазын күжүнүң дугайында төөгүлер бар.
Ω Бурун Египетке фараоннуң аъттарынга алдын дагалар кадаар турган. Орукка ындыг олча тып алган бөдүүн кижи бай-шыдалдыг, аас-кежиктиг апаар турган.
Ω Тоолчургу чугаада дарганнар болгаш ювелирлерниң камгалакчызы ыдыктыг Дунстан Кентерберийский аза-четкерни туткаш, эжиктеринде дага кадап каан бажыңнарже кажан-даа кирбес кылдыр думчуун кыскаш-биле ызырткаш, дагалапкан дээр.
Ω Руська аът кижиниң эң-не кол дузалакчызы чораан. Ооң кадыкшылындан ээзиниң аас-кежии, чедиишкини хамааржыр турган. Ынчангаш дага чедиишкинниң демдээ апарган.
Ω Аас-кежик эккээр кылдыр даганы каяа кадап алыр болза эки?
Бажың иштинге даганың мыйысчыгаштарын өрү баштандыр азарга, чедиишкиннер чыглыр. А мыйысчыгаштарын куду баштандыр азарга — бажыңче кирген кижиже чедиишкин чаштаар деп санаар. Оон өске тайылбыр база бар: эжиктиң кудумчу талазынга даганы мыйысчыгаштарын куду баштандыр азарга, бажыңче кирип орган кижиниң багай бодалдары азы каргыжы эсти бээр.
«Шын» №42 2024 чылдың июнь 8