Ак-көк дээрлиг азий диптиң төвү болган хостуг, делгем Тывавыста салым-чаяанныг башкылар хөй. Оларның аразында бөдүүн сеткилдиг, ажылынга бердинген, быжыг тура-соруктуг дагдыныкчы башкы Анжелика Өнер-ооловна Серен-оолду хамаарыштырып болур.
Хүндүлүг башкывыс хөй чылдарның дургузунда өскен-төрээн Бай-Хаак суурунда үре-түӊнелдиг ажылдап чоруур.
Таңды кожууннуӊ Бай-Хаак сумузунуӊ уран чүүл школазы бурунгаар көрүштүг, даады-ла чаа арга-хевир-биле ажылдавышаан, салым-чаяанныг ажы-төлдүң сагыш-сеткилин чүглендирип, сонуургалдарын делгемчидер сорулгалыг.
Дагдыныкчы башкывыс уругларны танцы-самныӊ чажыттарынга өөредип чоруур. Бичии чаштар, элээди оолдар, кыстар башкызыныӊ айыткан шагында озал чок, улуг сонуургал-биле кээп турарлар.
2003 чылда Анжелика Өнер-ооловна уругларныӊ уран чүүл школазынга «Дамырак» танцы-сам бөлүүн тургускан. 2019 чылда «Үлегерлиг ансамбль» деп атка төлептиг болган. Ол дээрге-ле башкыныӊ ажылыныӊ үре-түӊнели. Амгы үеде «Дамырак» бөлүү чаӊгыс тиилелгеге доктааваан. Кожууннуӊ иштинде улуг-даа, бичии-даа байырлалдарга танцы-сам бөлүү улус-чонну өөртүп, кайгадып чоруурлар.
Анжелика Өнер-оолов- на – ада-иезиниӊ дун кызы. Биче чажындан кырган-авазы, Ада-чурттуӊ Улуг дайыныныӊ киржикчизи Норжуӊ Балчыр-ооловна Кыргыстыӊ кижизидилгезинден ындыг болган бе, ол кылган ажылын эчизинге чедирер, бодунга негелдези улуг, кадыг-бергеге торулбас кижилерниӊ бирээзи.
Сураглыг башкывыс салым-чаяанныг аныяк салгалдарны чүгле танцы-самга эвес, а төрээн чуртунга ынакшылды, тыва дылды үнелээрин, эп-найыралдыг, демниг, патриотчу болурун кижизидип турар.
Салым-чаяанныг башкывыс Анжелика Өнер-ооловна 1990 чылда Эрес Сарыг-оолович биле кады өг-бүле туткаш, 3 оол, 1 кысты кижизидип өстүрген.Хөй чылдар дургузунда ак сеткилдиг ажылы дээш хөй шаӊнал-макталдарның база «Тыва Республиканыӊ культуразыныӊ алдарлыг ажылдакчызы» деп бедик аттың эдилекчизи болганынга кады ажылдап чоруур башкылары өөрүп, чоргаарланып чоруур бис.
Таңды кожууннуң Бай-Хаактың уран чүүл школазының коллективи.
“Шын” № 7 2024 чылдың январь 31