Чазакка Тываның Баштыңы Владислав Ховалыгның удуртулгазы-биле Хөй-ниити чөвүлелиниң хуралын эрттирген. Аңаа “Тываның маадырлары” төлевилелдиң киржикчилеринге дагдыныкчыларның баш бурунгаар тургускан даңзызын көрген. Сентябрь айда программаның киржикчилериниң өөредилгези эгелээрге, түңнел даңзы билдинер.
Бо чылын Тываның Баштыңы Владислав Ховалыгның эгелээшкини-биле «Тываның маадырлары» төлевилел ажылдап эгелээн. Ол тускай шериг операциязының дайынчыларынга тайбың амыдыралга боттарының арга-шинээн көргүзер арганы берип турар. Ук төлевилелдиң шилилге чадазы эрткен. 600 кордакчыдан 30 кижини шилип алган. Сентябрь айдан эгелеп Тываның күрүне университединге бир чыл үргүлчүлелдиг өөредилге эгелээр.
“Киржикчи бүрүзү нарын даалгаларны күүседирде, боттарының тура-соруктуун болгаш шиитпирлиин көргүскен. Күрүне болгаш тус чер чагырга албан черлериниң удуртукчуларының аразындан кижи бүрүзүнге дагдыныкчыны томуйлаар даалганы бистиң чөвүлеливис хүлээнип алган. Төлевилелдиң киржикчилеринге күрүне болгаш тус чер чагырга албан черлеринге удуртукчу албан-дужаалдарже шилчииринге дузалажыры дагдыныкчыларның сорулгазы” – деп, Тываның Баштыңы Владислав Ховалыг чугаалаан.
Дагдыныкчылар боттарының хүлээнип алган улузу-биле доктаамал харылзаалыг болур. Төлевилелдиң киржикчилери өөредилге үезинде дузазын алыр кижизин, сайыт-даа болза, кожуун чагыргазының даргазы-даа болза, боттары шилип алганнар. Шупту чүве дайынчының келир үеде планнап турар ажыл-чорудулгазының адырындан хамааржып турар.
“Дагдыныкчыны шилиир программада 6 чаданы киирген, ооң иштинде белеткел чадазы, дагдыныкчылар-биле баштайгы таныжылга болгаш шилилге, бир дугаар ужуражылга, дагдыныкчы болурунуң сорулгаларынга болгаш хевиринге дугуржулга, стажировка, ооң түңнелдерин үндүрери, карьераже үнерин тодарадыр чадалар. Регионнуң “Тываның маадырлары” төлевилелинде 4 өөредилге программазы болгаш 3 чадалыг стажировка кирип турар” – деп, Чазактың күрүне албанының айтырыгларының талазы-биле департаментиниң начальнигиниң оралакчызы Алдынай Монгуш чугаалаан.
Стажировкалар күүсекчи эрге-чагырга органнарынга, кожуун чагыргаларынга болгаш федералдыг тургузугларга эртер. Төлевилелдиң киржикчилери стажировкага экономика, көдээ ажыл-агый, спорт, туризм, кем-херек үүлгедиишкиннерин болдурбазы, сайгарлыкчы чорук болгаш үлетпүр дээн ышкаш ажыл-чорудулганың адырларын тус-тузунда шилип алганнар.
«Төлевилелдиң киржикчилериниң чамдыызын бо чылдың төнчүзүнге чедир ажылга тургузар бис. Оларның 20-30 хуузу өөренмишаан, ажылдаар күзелдиг. Ынчангаш бис оларга декабрьга чедир ажылга тургустунуп алырынга дузалажыр бис» – деп, Тываның Чазак Даргазының оралакчызының хүлээлгезин күүседип турар Айдыс Сынаа чугаалаан.
Дагдыныкчыны томуйлаары дээрге төлевилелдиң кол кезээ-дир, ооң ачызында регионалдыг удуртукчулар киржикчилерни деткип, арга-дуржулгазын үлежип, ажыл тып алырынга дузалажыр. Дагдыныкчыларның баш бурунгаар даңзызынга даянып, сентябрьда ийи таланың ужуражылгазын эрттирер, аңаа кады ажылдажылга дугайында сөөлгү шиитпирни хүлээп алыр.
«Тываның маадырлары» программаның киржикчи бүрүзү дайынчы хөделиишкиннер үезинде чугула болгаш нарын айтырыгларны шиитпирлээринге беленин, патриотчу хей-аъдының бедиин бадыткап, Ада-чуртунга бараан болурунуң ёзулуг үлегер-чижээ апарганнар.
Дагдыныкчылар-биле ажылдаары киржикчилерни чедиишкинниг болгаш шынарлыг ажылга белеткээр, оларга таарымчалыг ажыл тып алырынга дузалаар.
Бо программа тускай шериг операциязының киржикчилерин мергежилиниң талазы-биле деткииринче болгаш сайзырадырынче угланган канчаар-даа аажок улуг ужур-уткалыг эгелээшкин дээрзин демдеглээри чугула. Төлевилел удуртулга тургузугларынче киреринге болгаш келир үеде ажыл-албанга депшилгеге ажыктыг, арга-дуржулгалыг күрүне албан-дужаалдыг кижилерниң өөреникчизи болуп, бүрүнү-биле өөредири көрдүнген төлевилел-дир.
Чыжыргана СААЯ.
Буян Ооржактың тырттырган чуруу.
“Шын” №31 2025 чылдың август 14