Бо чылдан тура Тывага бир байырлыг хүн тывылган— Дайынчы хөделиишкиннер хоочуннарының хүнү.
Июль 1-де, Тываның найысылалынга тус черниң дайын киржикчилериниң тураскаалынга боодал чечек салыр ёзулал бир дугаар болуп эрткен. Ол ышкаш дайынчы хөделиишкиннер хоочуннарының шынзылгазын база байырлыг байдалга ТШО киржикчилеринге тывыскан. Тываның Баштыңы Владислав Ховалыг, Дээди Хуралдың Даргазы Каң-оол Даваа, эрге-хоойлу органнарының ажылдакчылары, Афганистан болгаш Чечня дайыннарының киржикчилери, ТШО киржикчилери болгаш хоочуннары байырлыг хемчегге келген.
"Кайгамчыктыг хүнде дыка үр манаанывыс дайынчы хоочун шынзылгаларын алдывыс. Кижи бүрүзүнге, ылаңгыя регионнуң "Ада-чурт камгалакчылары" фондуга болгаш Россияның Камгалал яамызынга, өөрүп четтиргенивисти илередип тур бис"– деп, ТШО-нуң киржикчизи Чимит Саая демдеглээн.
“Сөөлгү чылдарда бистиң улуг Россиявыстың дыка хөй регионнарында хоочуннар организациялары кандыг-даа албан бадыткал чокка бо хүнде чыглып эгелээн. Бо хүн Ада-чурт камгалакчыларынга, өзүп орар салгалга кайы хире чугула дээрзин билгеш, «Тыва Республиканың байырлалдарынга хамаарышкан» Тыва Республиканың хоойлузунче өскерилгеге атты салдым. Амы-тынындан маадырлыы-биле чарылган дайынчыларга мөгейдивис. Июль 1 шупту дайынчыларны мөөңнеп каттыштырыпкан. Кандыг хөделиишкиннерге киржип турганы кол эвес. Олар шупту бодунуң хүлээлгезин күүсеткен – Ада-чурттун камгалаар. Чоргаарланып чор бис!” – деп, Тываның Баштыңы бодунуң блогунга бижээн.
Дайынчы хөделиишкиннер хоочуннарының хүнүн тургузар деп эгелээшкинни июнь 18-те сөөлгү часкы сессияда Дээди Хуралдың депутаттары деткээн.
“Бо дээрге Дээди Хуралдың депутаттарының болгаш тускай шериг операциязының киржикчилериниң эгелээшкини. Депутаттар шуптузу чаңгыс үн-биле бадылаан. А бо хүннерде Тываның Баштыңы ук хоойлуга атты салган. Ынчангаш дайынчы хөделиишкиннер хоочуннарынга байыр чедирип тур бис! Бо дээрге бистиң оолдарывыска, ооң иштинде Тиилелгениң өргээзинге амы-тынын берген улуска хүндүткелдиң, сактыышкынның демдээ болур” – деп, Дээди Хуралдың депутады Эрес Хуурак демдеглээн.
Олча ОНДАР.
Ада ТЮЛЮШТУҢ тырттырган чуруу.
“Шын” №25 2025 чылдың июль 3