Декабрь 9 — Ада-чурттуң Маадырларының хүнү. Бо хүн Ада-чурт дээш амы-тынын берген маадырларга болгаш Ада-чуртка бараан болуп турар Совет Эвилелиниң база Россияның маадырларынга, Святой Георгий орден болгаш Алдар орден-биле шаңнаткан маадыр дайынчыларга мөгейип, оларны алдаржыда- ры — чаагай шериг чаңчыл.
Тывада Ада-чурттуң Маадырлары шупту 15 дайынчы. Оларның он бири – Ада-чурттуң Улуг дайынының киржикчилери. Күрүнениң мурнунга ачы-хавыяазы дээш Сергей Шойгу 1999 чылда Россия Федерациязының Маадыры атты алган. Россия Федерациязының Маадыры атты 2022 чылда сержант (ам лейтенант) Мерген Доңгакка, 2024 чылда улуг лейтенант Чалым Чүлдүм-оолга болгаш биче сержант Буян Кууларга тывыскан.
Ада-чурттуң Маадырларының хүнү декабрь 9-түң бүдүүзүнде Тываның Баштыңы Владислав Ховалыг тускай шериг операцияның киржикчилери, маадыр дайынчылар Мерген Доңгак, Чалым Чүлдүм-оол болгаш Буян Куулар олар-биле ужурашкан. Шериг албан-хүлээлгезин күүседир хуусаазы чоокшулаан назы-харлыг аныяктарның эге шериг белеткел төвүн Тывага ажыдар дугайында саналды маадыр дайынчылар идип үндүргеннер. Ындыг төптү республикага ажыдыптар болза, оолдарны дайынчы эге арга-мергежилге олар шеригже келдиртир мурнунда-ла өөредип болур. Бо чүүл шериг албан-хүлээлгезин эрттиреринге оларга дуза боор. Владислав Ховалыг маадырларның сүмезин деткээн, ону херек кырында боттандырарынга белеткелди дораан эгелээр бодалын илередип: “Маадырларның сүмези кончуг өй-шаанда санал-дыр” – деп демдеглээн.
Мерген Доңгак, Чалым Чүлдүм-оол болгаш Буян Куулар суглар-биле ужуражыышкын дугайында бодунуң блогунга бижээш, Ада-чурттуң дайынынга Улуг тиилелгениң 80 чылын келир 2025 чылда демдеглээрин сагындырып, немец-фашистиг Германияны хөй национал совет улустуң чылча шапканы кончуг улуг шериг-төөгүлүг болуушкун деп айыткан. “Бистиң маадыр өгбелеривис, тыва эки турачылар, Тыва Арат Республикадан Ада-чурттуң Улуг дайынынче аъттанган аңгы-аңгы национал солдаттар, немец фашизмни тиилээр дээш, эрес-дидими-биле дайылдашканнар” – деп, Тываның Баштыңы демдеглээн.
Улуг Тиилелгениң юбилейинге тураскаадып, ол ышкаш шериг операция үезинде российжи чон бергелерни ажып эртери-биле холбаштыр бүгү Россияда болгаш бистиң республикада аныяк-өскенниң патриотчу кижизидилгезинче күрүне улуг кичээнгейни салып турар. Патриотчу кижизидилге үезинде шыңгыы кичээнгейни Ада-чурттуң Улуг дайынының маадырларын утпайн, оларның ат-алдарын салгалдарга дамчыдып арттырарынче, тускай шериг операцияны эрттирип турарының алыс чылдагааннарын угаап билиринче угландырган.
Тываның аныяк-өскениниң шериг-патриотчу кижизидилгезин улам чогумчударының дугайында база Тываның Баштыңы Владислав Ховалыг тускай шериг операцияның киржикчилери маадырлар-биле чугаалашкан.
Ш. МОҢГУШ белеткээн.
Чуруктарны интернет четкизинден хоолгалаан.
«Шын» №94 2024 чылдың декабрь 7