Дайынчылар поездизи

Балыгланган дайынчылар чүдүрүпкен,
Вагоннарын аары кончуг сөөртүп алган.
Хөйнү көрген поезди-даа дүннү уткуй,
Човууртаан дег, кускуннап каап чоруп олур.

Улуг чурттуң делгемнери төнер эвес,
Хоорай санай эмчилерге дүжүрүп чор.
Балыг эрлер бистер-биле байырлашкаш,
Баар чери эмчизинче углап турлар.

Өртээл санай дайынчылар дүшсе-дүшсе,
Өөрлеривис эвээжээн-дир, вагон сыыгаан.
Бичии-даа бол тиилелгени чоокшулаткан,
Дайынчылар сегип кээрин күзеп каалы.

Кадыг дошкун тулчуушкундан чалданмайн,
Өскелерниң артындыва чаштынмаан силер!
Каң дег быжыг кадыкшылды күзеп каалы.
Өөңерге онча-менди чанып кээр силер!

2023 чыл, январь.
Байлак САТ.

"Шын" №57 2024 чылдың июль 31