Декабрь 19-та найысылал Кызылда Тиилелге шөлүнге “Шуптузун Тиилелгеже” деп акция-биле дайынчыларның чагыы ёзугаар тускай шериг операциязының зоназынче 8 автомобильди чоруткан.
Бо удаа акцияга Республиканың 1 дугаар эмнелгези, Тываның гуманитарлыг болгаш дузалал социал-экономиктиг тускай шинчилелдер институду, Кызыл кожууннуң төп эмнелгези, Барыын-Хемчиктиң кожууннар аразының медицина төвү база өскелер-даа киришкен. Ол ышкаш бир хавырткан, суд департаментизинден база бирээзи дайынчының машиназын чоруткан.
Машиналар-биле кады ТШО киржикчилеринче чурттакчы чоннуң болгаш албан черлериниң чыгган гуманитарлыг дузазын база чоруткан. Ында камгаланыр четкилер, оңгу лаалары, чылыг хептер, тыва далган, боорзак дээш өске-даа национал аъш-чем аймаан суп каан.
“Машинаны ажыглаарынга белен. Бо машинаны чорудар мурнунда техниктиг хандырылгазын кылган. Маслозун, тосолун солаан, дугуйларын база чаарткан. Эң-не кол чүүл бензинни долдур куткаш, канистрлерде база курлавырлап, домкрат болгаш дугуй дүлгүүрүн база суп каан. Бүрүнү-биле бо машиналарны белеткээн. Газель биле “буханка” машиналар чорудуп турарывыс ужуру чүък-даа, кижилер-даа аай-дедир сөөртүрүнге улуг машиналар ажыктыг”– деп, республиканың 1 дугаар эмнелгезиниң өрт айыылының талазы-биле кол специализи Шораан Кыргыс чугаалаан.
Барыын-Хемчиктиң кожууннар аразының медицина төвүнүң улуг эмчизи Чимис Куулар коллегалары-биле кады дайынчыларга эки күзээшкиннерни йөрээп, коллективиниң мурнундан машинаны дамчыдып чедип келген. “ТШО-да киржип турар чаңгыс чер чурттугларывысче дүрген дуза машиназын дамчыдып бээр дээш чыглып келдивис. Бо дугайын бүдүн коллектив шиитпирлээн. Чаа чыл мурнунда бистиң дайынчыларывыска белек кылдыр сөңнеп турарывыс бо” – деп, Чимис Куулар чугаалаан.
ТГШИ-де ТШО киржикчилеринге дузалажыр волонтёрлар пунктузу 3 чыл ажылдап турарын институттуң директору Вячеслав Март-оол демдеглээн:
“Бо күзүн ТШО киржикчилери-биле ужуражылга болган. Бистиң ажылдап турар оран-сававыска келгеш, аажок сонуургааннар. Ужуражылга үезинде “буханка” машинавысты көргүскен бис. Олар аажок өөрээн. Ынчангаш дайынчыларга дээш белеткээш, чорудуп турарывыс бо. Ооң мурнунда Ниваны база чоруткан бис. Оолдарывыс онча-менди, кадык, Тиилелгелиг чанып келзин дээш, бо машинаны берип турар бис”.
Оон аңгыда, “Цеченлинг” хүрээзиниң волонтёрлар шимчээшкини болгаш Россияның сарыг шажынчылар ассамблеязы артыштарны болгаш чылыг хептерни чоруткан. Бистиң республиканың ламалары база акцияга катчып, мотоциклди болгаш камгаланыр четкилерни дамчыдып берген.
“Бис хүрээниң волонтёрлары болгаш ламалары дүн-хүн чокка иженип, камгаланыр четкилерни аргып, чер-чурттувус оолдары онча-менди, тиилелгелиг чанып келзин дээш, хүннүң-даңның тейлеп турар бис” – деп, дид Камбы-лама Лопсан Монгуш чугаалаан.
“Автопоезд” акция-биле ук машиналарны демир-орук-биле төлевир чокка дайынчыларга чедирип бээр.
Чыжыргана СААЯ.
Буян Ооржактың тырттырган чуруктары.
“Шын” №98 2024 чылдың декабрь 21