Дайынчыларга камгаланыр четкилер

Тускай шериг операциязында чаңгыс чер чурттугларывысче гуманитарлыг дуза чорудар ажылдар уламчылавышаан.

Дайынчы хөделиишкиннер эгелээнден бээр амгы үеге чедир Кызыл хоорайның хоочуннары, волонтерлар дайынчы чычааннарга тускай шывыгларны даарап эгелээн. Ооң мурнунда четкини бүрүнү-биле кожуп, даарап турган болза, а ам белен дайынчы четкини садып бээрге, аңаа шокар пөстерни илип, өрүп турар апарган.

«Деловая Россия» шимчээшкининиң төлээзи Мерген Санчай-оол: «Деловая Россия» шимчээшкининге дайынчы шывыглар даараарынга ажыглаар четки садар дугайында дилегни Улусчу полк киирген турган. Бистиң шимчээшкинниң бир кежигүнү 50 ажыг дайынчы четкини садып эккелгени бо.

Дайынчы шывыглар бо хүннерде тускай шериг операциязында киржип турар чаңгыс чер чурттугларывыска чугула херек. Дайынчы даалгалар күүседип турар үеде ол шывыглар-биле шыптыныпкаш, диргелип келген айыылдан камгаланып, чаштыныптар аргалыг.

Тиилелгени чедип алырынга кижи бүрүзүнүң киржилгези кончуг чугула деп санап турар бис. Ынчангаш «Деловая Россия» шимчээшкинниң өмүнээзинден дайынчы шывыг даараарынга ажыглаар өзек четкилерни саткаш, Улусчу полкка эккеп бердивис».
Бир четкиниң өртээ 1442 рубль. Четки бүрүзү 18 дөрбелчин метр дээрзин сагындыраал.

«Тываның сайгарлыкчыларының эккелгени дайынчы четкилерни кадет корпузунуң волонтерларынга өрүп эккээр кылдыр хүлээдип тур бис. Сайгарлыкчылар чүгле четкилер эвес, а ону чедир өрүүр пөс-таавыны база эккелген. Чалыы волонтерлар бөгүн мастер-класска канчаар өрүүрүн өөренип алгаш, элээн кашты хүлээнгеш, школазынга өрүп эккээр.

Четки даарап турар волонтерларлыг кожууннарже база элээн кашты чорудары планда көрдүнген. Сайгарлыкчыларга өөрүп четтиргенивисти илередир-дир бис. 18 дөрбелчин метр четкини дөрт кижи бүдүн чартык хүн дургузунда өрүүр» – деп, Тыва Республикада Улусчу полктуң куратору Александра Шакирова тайылбырлады.

Волонтержу элээдилерниң аразында алышкылар база бар. Марат кадет корпузунуң 7-ги клазының доозукчузу, а Меңги ооң бичии дуңмазы, 5-ки классты дооскан. Марат волонтержу ажыл кылырда, дуңмазы Меңгини эдертип алганын чугаалады.

Айдың ОНДАР.
Ада ТЮЛЮШТУҢ тырттырган чуруу.

“Шын” №48 2024 чылдың июнь 29