Тываның шериг комиссариады-биле “Ада-чурт камгалакчылары” күрүне фондузунуң регионалдыг салбырының аразында дугуржулга ёзугаар дайынчы хөделиишкиннер хоочуннарынга шынзылгаларны байырлыг байдалга тыпсып эгелей берген.
Дайынчы хөделиишкиннер хоочунунуң шынзылгазы дээрге бүгү-ле чиигелделерни алыр дугайында херечилеп турар чугула документилерниң бирээзи дээрзин “Ада-чурт камгалакчылары” күрүне фондузунуң Тывада салбырының удуртукчузу Мерген Кызыл-оол чугаалаан:
– Бо хүнде Москваның төп аппарадының удуртулгазындан бистиң салбырже дайынчы хөделиишкиннер хоочуннарынга шынзылгаларны кылыры-биле, 100 ажыг билдириишкинни чоруткан. Россияның Камгалал яамызының комиссиязының шиитпириниң соонда, шынзылгаларны алгаш, бистиң дайынчыларывыска байырлыг байдалга улаштыр тыпсыр бис. Ооң мурнунда шынзылгаларны чылда 1 азы 2 катап тыпсыр турган. Ам бистиң кылып алган дугуржулгавыс ёзугаар хөйү-биле байырлыг байдалга тыпсыр деп шиитпирлээн бис. Бистиң дайынчыларывыска шынзылга дээрге ачы-хавыяалыг саавыр-ла болгай.
Оон аңгыда, күрүне фондузунуң салбырынче чартык чыл дургузунда барык 3500 бижимел дилеглер кирген, 2800 кижи дуза дилеп келген. Шупту айтырыгларны Чазактың бүгү-ле органнарының күжениишкини-биле шиитпирлеп турар бис. Эң-не хөй кирип турар дилеглер чурттаар оран-сава тудуп алыры-биле, черлерни бээринге хамаарышкан. Бөгүн оларның саны 500 ашкан. Ийи дугаарында, дайынчы хөделиишкиннер хоочуннарының шынзылгаларын кылырының талазы-биле дилеглер хөйү-биле кирип турар.
База бир эң-не чидиг айтырыгларның бирээзи – ис чок читкен шериглерни дилеп тыварынга дуза дилээн айтырыглар.
Дайынчы хөделиишкиннер хоочуннарының шынзылгаларын тыпсыр байырлыг хемчегге хуусаалыг шериг албанын эрттиргеш, улаштыр дайынчы керээ чарып алгаш, тускайлаттынган шериг операциязынга үлүг-хуузун киириштирген 20 харлыг Сергек Күжүгет база шынзылга алыры-биле келген. Ол аңаа 3 ай болган. Чогуур ужурлуг сорулгаларын күүсеткен соонда, Россияның Камгалал яамызының талазындан дайынчы хөделиишкиннер хоочунунуң шынзылгазын тыпсырын шиитпирлээн.
Ук хемчегге Социал фондунуң республикада салбырының төлээзи Урана Монгуш база келген. Ол шериг албанныгларга болгаш ТШО киржикчилеринге Социал фондудан алыр пенсия хандырылгазының дугайында чугаалап берген. Шак ындыг төлевирлерни тускай чурум ёзугаар кылырын ол демдеглээн. Дайынчы кижини кадыы кызыгаарлыг (инвалид) деп бадыткап турда, тускай пенсия тыпсыр, а дайынчы хөделиишкиннер хоочуннарынга ай санында төлевирлерни бээр.
Чыжыргана СААЯ.
“Шын” №92 2023 чылдың декабрь 2