Дайынчыларның чагыын күүсеткен

Чоокта чаа тускай шериг операциязында киржип турар чаңгыс чер чурттугларывыстан видео-дилег келген. Дайынчы хөделиишкиннер девискээринде чаңгыс чер чурттугларының дилээн хандырары-биле Улусчу фронтунуң Тыва Республикада салбырының даргазы Саима Далчин болгаш өске-даа төлээлер чогуур ажылдарны кылып чоруткан. Түңнелинде, чорук чогаан.

Улусчу фронтунуң тыва Республикада салбырының даргазы Саима Далчин:
– Тускай шериг операциязында дайынчыларывыска гуманитарлыг дуза чыыр ажылдар ам-даа уламчылавышаан. Удавас июль айның төнчүзүнде ээлчеглиг чүъктү аъткарар бис. Чон идепкейлии-биле дузаны кадып, шыдаар-ла чүүлдерин Улусчу фронтунуң болгаш «Ада-чурт камгалакчылары» федералдыг фондунуң регионалдыг салбырының Кызыл хоорайда штавында эккеп турар.

Бөгүн аажок өөрүнчүг хүн болду. 55-ки гвардейжи мотоадыгжы (даг) бригаданың дилээн езугаар «Трансстрой» тудуг компаниязы квадроциклди саткаш, Улусчу фронтуда хүлээдип турары бо. Шак-ла мындыг күштүг квадроциклди олар дилээн турган. Дайынчы хөделиишкиннер девискээринге даалгалар күүседиринге кончуг таарымчалыг хөлге-дир. Бистиң дилээвиске харыылааны дээш «Трансстрой» тудуг компаниязынга өөрүп четтиргенивисти илередир-дир бис. Июль төнчүзүнде өске-даа гуманитарлыг дуза-биле катай чедиргеш, чагыг киирген дайынчыларга хүлээдир бис.

«Тускай шериг операциязында киржип турар чаңгыс чер чурттугларывыска «Транстрой» тудуг компаниязының өмүнээзинден квадроциклди Улусчу фронтуга хүлээдип берип тур бис. Тиилелгени күзедивис» – деп, «Трансстрой» тудуг компаниязының кол инженери Александр Поцлавиский чугаалады.
«Трансстрой» тудуг компаниязы Кызыл хоорайда «Мөңгүн» микрорайонун тудуп турар компания дээрзин сагындыраалы.

Айдың ОНДАР.
Буян ООРЖАКТЫҢ тырттырган чуруктары.

"Шын" №53 2024 чылдың июль 17