Февраль 1-ниң хүнүнде Шагаа мурнунда Тывадан ТШО киржикчилеринче чорудары-биле чүъктү белеткээн. Ээлчеглиг дуза чыылдазынга республиканың кожуун чагыргалары, ажылчын коллективтери, хууда сайгарлыкчылары болгаш сагыш човангыр чурттакчы чону киришкен.
Улусчу фронтунуң регионалдыг күүсекчи комитединиң удуртукчузу Саима Далчинниң чугаалап турары-биле алырга, чыгдынган чүъктү чедер черинге чедир 5 болгаш 20 тонна чүдүрер ийи улуг чүък машиназынга чедирер.
“Бо удаа бис дайынчыларывыска дуза чыылдазын чедирери-биле 2 машинаны чорудуп турар бис. 5 тонна чүдүрер фурага эътти чүдүрген, а 20 тоннуг чүък машиназында “УАЗ” маркалыг 3 автомобиль болгаш өске-даа дериг-херекселдер бар. Ачы-дуза чедирилгезин ДУР, ЛУР болгаш Запорожье 3 аңгы угланыышкынче чорудар. Чедер ужурлуг черинге февраль 8–9 хүннеринде чеде бээр кылдыр планнап турар бис” – деп, Саима Далчин чугаалаан.
Ол ышкаш Тывадан чоруур делегация-биле лама башкы база чоруурун ол дыңнаткан. Лама башкы Запорожьеде бистиң дайынчыларывыска Шагаага уткуштур номналды база кылыр.
Бодунуң ээлчээнде Тываның садыг-үлетпүр палатазының чөвүлелиниң даргазы Аяс Мөңге садыг-үлетпүр палатазының кежигүннери бүгү-ле сагыш човангыр чаңгыс чер чурттугларывыс-биле кады Тываның Баштыңы Владислав Ховалыгның кыйгырыын деткип, гуманитарлыг дузаны чедирери-биле 20 тоннуң чүък машиназын аңгылап бергенин чугаалаан:
“Чүък машиназын ук девискээрже 2 удаа барып чедип турган арга-дуржулгалыг чолаачы мунуп чедирер. Ол ам 3 дугаар чорууру ол. Аңаа бистиң чаңгыс чер чурттугларывыстың чыган “УАЗ” маркалыг 3 автомобильди болгаш гуманитарлыг дузаны чүдүрүп чедирер” – деп, Аяс Мөңге чугаалаан.
ТШО киржикчилеринге 3,5 тонна хой, инек, аът эъди чыгдынганын хоорайжыткан Каа-Хем суурнуң Төлээлекчилер хуралының депутады Денис Денисов чугаалаан:
“Эътти республиканың аңгы-аңгы кожууннарындан эккелген. Эътти кескеш, хаптаар ажылдарны бистиң республиканың хөй санныг эки турачы волонтёрлары кылган. Хаптаар ажылдарны хыналдага алыры менде быжыглаттынган. 5 тоннуң чүък машиназынче эътти болгаш өске-даа херекселдерни чүдүрдүвүс”.
Чыжыргана СААЯ.
Ада ТЮЛЮШТУҢ тырттырган чуруктары.
“Шын” №8 2024 чылдың февраль 3