Далай канчап барган? / Чаа-Хөлден медээлер.

Эрткен чылдарның июнь айның ортан үезинден эгелеп, Чаа-Хөлде кылымал далайга улус эштип эгелей бээр турган болза, бо чылын далай турар черде кургаг. Бо байдал кожууннуң көдээ ажыл-агыйлыгларынга, ылаңгыя малчыннарга суг талазы-биле нарын байдалды тургузуп турар.
Чаа-Хөл кожууннуң көдээ ажыл-агый эргелелиниң даргазы Кежик Салчак:
– Саян-Шушенск ГЭС-тиң суг шыгжамыры болур кылымал далай 30 муң дөрбелчин га черге дуй чыдыптар турган. А бо чылын далайывыс бодунуң савазынче келбээн, арай саадап турар. Бо байдал малчыннарга арай бергедээшкиннерни таварыштырып турар. Бо хүннерде 40 ажыг малчын аалдар ооң эриктерин дургаар чайлагларынче көжүп келген. Бурган даа, Чайлаг-Алаак, Булак-Бажы дээш өске-даа чайлагларның малчыннары мал-магнын суггарарда, 9 – 10 ажыг километрни эрткеш, Чаа-Хөл хемден суглап ап турар. Малчын кижиниң чайгы үеде кылып четтигер хөй ажылдарынга көрдүнген үезиниң хөй кезии ынаар чарыттынып турар. Ам кажан далай савазын долуп кээри билдинмес. Манаар апаардан өске, бисте аңгы тайылбыр чок.
К. Монгуш