Дамдыннар Тываны таныштырар

«Россия — аргаларның чурту» деп Президент платформазының «Өг-бүлевистиң чаңчылы» мөөрейниң түңнел чадазында Дамдыннарның өг-бүлези Тываны таныштырар.

Мөөрейниң түңнел чадазы Москва облазынга июль 5-тен 8-ке чедир «Сенеж» эргелелдиң мастерскаязынга болур (үш кол адыр: күрүнениң, бизнестиң база ниитилелдиң удуртукчуларын белеткээр немелде өөредилге төвү). Түңнел мөөрейже 83 региондан ийи муң ажыг кижи кирген.

«Түңнел мөөрейге белеткенип эгеледивис. Бо хүннерде мөөрейниң организакчылары бис-биле онлайн-интервьюну кылды, аңаа боттарывыстың дөрт салгал кирип турар өг-бүлевисти таныштырдывыс» — деп, Долаана Дамдын чугаалаан.

Мөөрей хүннеринде өг-бүлелер угаан сайзырадыр, спортчу база чогаадыкчы онаалгаларны күүседир. Командалар чүгле ханы билиглерин болгаш тывынгырын көргүзер эвес, командалыг ажылын база бадыткаар: ада-ие биле ажы-төлүнүң демниин.

«Мөөрейге киржир саналды өөм ишти сүмелээн. Өг-бүлевис шупту деткээн бис. Мөөрейниң ачызында өг-бүлевис улам демниг апардывыс. Ооң мурнунда-даа өг-бүлевис-биле чыглыр турдувус. Ам белеткелдер үезинде үргүлчү чыглып, угаан сайзырадыр оюннар ойнаар чаңчылдыг апардывыс» — деп, Леонид Дамдын чугаалаан.

Бүгү-российжи мөөрейниң тиилекчилерин июль 8-те — Өг-бүле, ынакшыл болгаш шынчы чорук хүнүнде чарлаар. Тиилекчи 30 өг-бүле 5 сая рубльдиң сертификаттарын алыр. Шаңнал акшазын чурттаар оран-савазын экижидип алырынга: бажың азы квартира садып, ол ышкаш ипотеказын дуглап ап болур.

Кызыл кожуун чагыргазының медээлеринден.

“Шын” №49 2024 чылдың июль 3