Республикада «Тываныӊ дарганнар бажыӊы» деп чаа компания тургустунган.
Компанияныӊ удуртукчузун Наталья Полева дээр. Ол Кызыл хоорайныӊ чурттакчызы, боду инженер мергежилдиг. Доозуп алган эртеминиӊ аайы-биле ажыл тып чадаан кижилерниӊ бирээзи ол.
Наталья амыдыралчы, эрес-кежээ кижи болгаш, арга-хорганы тып алган. Хилис үе эрттирбейн, малгаш-дойдан угулза-хээлерни тудуп кылыр, ону чараштыр шимеп будуур мергежилге, демир-дестен ус-шевер ажылдар кылыр дарган кижиниӊ мергежилинге өөренип алган.
Ооӊ соонда социал керээ чарып алгаш, күрүне деткимчези 250 муӊ рубльдиӊ ачызында, демир-дестен, малгаш-дойдан ус-шевер ажылдар кылыр мастерская ажыдып алган. Чартык чыл иштинде бот-хандырылгалыг сайгарлыкчы болуп ажылдаан. Оон демир-дестен угулза-хээлиг эдилелдер, эт-сеп, бажыӊ даштыныӊ каасталгаларын кылыр хуу сайгарлыкчы херээн эгелээн.
Чогаадыкчы, тывынгыр, кызымак чоруунуӊ ачызында, ийи чыл болганда, Наталья Полева «Кузнечный Двор Тувы» деп аӊгы компания тургузуп алган.
Амгы үеде ол компания хоорайныӊ кудумчуларынга, агаарлап дыштаныр черлеринге, спорт шөлдеринге, рестораннарга, кафелерге болгаш бажыӊ-балгатка чараш эт-септи болгаш иштики-даштыкы каасталгаларны чагыг ёзугаар кылып турар.
Наадым биле Республика хүнүнге тураскааткан «Ус-куш» деп мөөрей болуп турган. Аӊаа Наталья Полева «Демир-дестен тергиин эки уран-шевер ажылдар» деп номинацияныӊ тиилекчизи болган.
Москва хоорайга болуп эртер «Тюбетейка» Восточный базар» деп делегей чоннарыныӊ культуразыныӊ фестивалынга киржир сертификатты чаалап алган. Ону шаӊнап, ооӊ ажылдарын үнелээнинге ол сеткилинден өөрүп, турарын, найысылал Москва хоорайга ноябрь 16–19 хүннеринде болур фестивальга шыӊгыы белеткенип алырын чугаалаан.
«Социал керээ дээрге бодунуӊ сайгарлыкчы ажылын ажыдып, херек материалдарын четчелеп алырыныӊ аргазы-дыр. Акша-хөреӊгим чедишпейн баар деп дүвүреп, сагыш човаан ажыы чок» — деп, Наталья Полева сүмелеп турар.
Чүткүлдүг, тура-соруктуг болгаш ажылгыр-кежээ, ус-шевер аныяк кижиниӊ социал керээ чарып алган соонда, аӊгы компания тургузуп алганы онзагай төөгү болур.
Р. ДЕМЧИК белеткээн.
Чуруктарны интернеттен алган.
«Шын» №74 2023 чылдың сентябрь 30