Тоолчургу чугаа
Чер-делегейге дириг амытаннар тыптып турда, оларга Бурган башкы таарышкан үннер тып берип, үлеп турган.
Үн үлээшкининге дээлдиген озалдап чедип келген. Бурган башкы дээлдигенниң озалдап чедип келгенин көргеш:
— Кезээде озалдап чоруур ындыг болгай сен, хамык үннер шуптузу үлеттинген — деп-тир.
Муңгараан дээлдиген тургаш:
— Үн чок канчап чурттап чоруур амытан боор мен, черле бир үнден хайырлап көрүңер, башкы — деп дилээн.
— Ам канчаар, бедик ыяш бажынга шимчевейн хараттынып олур. Ыяштың чаны-биле кандыг амытан алгырып эртер болдур, ону өттүнүп, ооң үнүн үлежир сен — деп, Бурган-башкы чарлык болган.
Дээлдиген-даа бедик дыт бажынга хонупкаш: «Кандыг-ла амытан ооң чаны-биле алгырып эртер ирги?» – дээш, шимчевейн, ол-бо талаларынче кайгаттынып, хараттынып олурган.
Дээлдиген бир көөрге, ооң чаны-биле кулуннуг бе киштеп эрттип бар чораннар. Дээлдиген, бе болгаш кулун киштээрге, кады киштеп өөренип алган.
Дээлдиген оон бээр-ле чылгы мал ышкаш киштээр апарган.
«Шын» №82 2024 чылдың октябрь 26