“Көшкүн чоннуң найыры” деп бир дугаар делегей чергелиг го маргылдаазы Тывага болуп эрткен.
Бо оюн 2500 чыл бурунгаар Кыдатка тывылган. Алдан-Маадыр аттыг музейде ук оюннуң шөлү, даштары барын Тывада Го чөвүлелиниң удуртукчузу Чамзырын Мижит дыңнаткан. Оюнну Тывага сайзырадыры-биле Тываның Баштыңы Владислав Ховалыг бо чылдың март айда Россияның Го чөвүлелиниң президентизи Максим Волковка ужуражып, делегей чергелиг фестивальды Тывага эрттирерин дугурушканнар. Чүге дээрге бо оюн бистиң республикада школачылар аразында улуг сонуургалды оттурган. Олар регионнар аразында маргылдааларга чедиишкинниг киржип турар.
Маргылдаага Кыдат, Мурнуу Корея, Моол, Казахстан, Кыргызстан, Узбекистан, Россияның Алтай, Красноярск, Забайкал крайлардан база Бурят, Хакас, Тыва, Татарстан, Саха-Якут республикалардан шупту 50 ойнакчы киришкен. Тывадан – 2 команда.
Сентябрь 12-де В. Көк-оол аттыг Национал хөгжүм-шии театрынга го маргылдаазының байырлыг ажыдыышкыны болган. Улаштыр театрга маргылдааның баштайгы 2 салыы, сентябрь 13-те Алдын-Булакка маргылдааның 3-4 салыглары, түңнел 5-6 салыглары “Сүбедей” спорт ордузунга болган.
Хууда бирги чер дээш маргылдаага: 1-ги черни Саха-Якутияның ойнакчызы Федор Еверстов, 2-ги черни Мурнуу Кореядан Чан Кю Ко, 3-кү черни база Саха-Якутиядан Александр Федоров алганнар. Командалар аразынга 1-ги черни Мурнуу Корея, 2-ги черни Саха-Якутия, 3-кү черни Казахстан командалары ээлээннер. Тергиин ойнакчы деп атка Мурнуу Кореядан Ким Сон Тук, 6 оюнга 5 тиилелгени алган тыва ойнакчы Ачыты Сандан олар төлептиг болганнар. Маргылдаага шылгарааннар диплом, кубоктар база тускай өртектиг белектер-биле шаңнатканнар.
БУТ БӨМБҮҮНҮҢ МАРГЫЛДААЗЫ
Кызылда Совет Тываның 5 чыл аттыг стадионга сентябрь 10-14 хүннеринде 14 хар чедир оолдарның 8 шилиттинген шыырак командалар аразынга 2025 чылдың тиилекчизин илередири-биле маргылдаа болган. Изиг оюннарның түңнелинде 1-ги черни Кызыл хоорайның командазы, 2-ги черни Барыын-Хемчик кожууннуң командазы, 3-кү черни Ак-Довурак хоорайның командалары үлешкеннер.
“ЦСКА-ТЫВАНЫҢ" ЮБИЛЕЙИ
Шеригниң “ЦСКА-Тыва” олимпийжи курлавырлар спорт школазының 10 чылынга тураскааткан байырлыг спортчу фестиваль сентябрь 12-14 хүннеринде болуп эрткен. Ооң ажыдыышкынынга Самара хоорайда Шеригниң Төп спортчу клувунуң удуртукчузу полковник Роман Махонин, ТР-ниң Дээди Хуралының Даргазы Каң-оол Даваа, ТР-ниң спорт сайыдының оралакчызы Саян Монгуш база Абаканда, Чадаанада Шеригниң төп спортчу клубтарының удуртукчулары Виталий Мордавкин биле Тухомел Кенден болгаш оон-даа өскелер киржип, “ЦСКА-Тываның" спортчуларынга, тренерлеринге болгаш удуртукчуларынга байырны чедирип, моон-даа соңгаар бедик спортчу чедиишкиннерни күзээннер. Делегей, Россия чергелиг маргылдааларга тиилелгелерни чедип ап турар спортчуларны белеткээринге шылгараан тренерлерге, ол ышкаш спортчуларга шаңналдарны байырлыг байдалга тывысканнар.
“ЦСКА-Тыва” олимпийжи курлавырлар спорт школазының 10 чылынга тураскааткан спортчу маргылдаалар сентябрь 12-14 хүннеринде “Херел”, “Сүбедей” спорт залдарынга 14 хар чедир назы-харлыг оолдар аразынга болуп эрткен. Эң шыырак элээди спортчулар хостуг хүрешке, дзюдога, бокска боттарының күжүн шенешкеннер. Ук маргылдаага Абакандан, Чадаанадан, шеригниң төп спортчу клубтарының салбырларының спортчулары кээп киришкен.
Алексей ЧАМБАЛ-ООЛ.
“Шын” №36 2025 чылдың сентябрь 18