2022 чылдың ноябрь 11-де Бишкек хоорайга самбога делегей чемпионадынга тыва мөге Саян Хертек алдын медальды чаалап алган. Ол ооң делегей чергелиг ийиги алдыны болган. Тываның Баштыңы-биле ужуражылгага республиканың спорт сайыды Субудай Монгуш, спортчунуң ат-сураглыг тренерлери, «Самбо-70» деп спорт болгаш өөредилге төвүнүң төлээлери Павел Фунтиков биле Денис Павлов келген.
Саян малчын араттың чымыштыг ажыл-ижин, ооң ада-иези малын малдаар дээш, кандыг кадыг-берге ажылды кылып турарын чугаалаарга, спортчунуң быжыг тура-соруу база шыдамыккайы оон үнген-дир деп, тренерлери чугаа аразында үлешкен.
– Кончуг сооктарда малчыннарны база малды камгалаар дээш, кижилерни вертолёттан бадырып турган деп чугаалаарга, шыны херек, карактарывыс аңгайып калган. Ындыг берге байдалдарны шыдаар-ла кижи шыдаар, ооң бадыткалы Саян-дыр – деп, Павел Фунтиков чугаалаан.
Ужуражылганың киржикчилери маргылдаа үезинде чемпионнуң тиилелгезиниң дугайында бодалдарын үлежип, таваржы бээр бергедээшкиннерин чугаалашкан. Мөгениң удурланыкчылары шыырак болганын, тиилелгени чедип алырынга күзел-сорук база шыдамыккай чоруу негеттингенин сонуургаткан. Амгы үеде ол Россияның ИХЯ-зының Москва облазында ажылдакчызы, самбо биле дзюдога дивизия маргылдааларының доктаамал киржикчизи. «Дайынчы хөделиишкиннер хоочуну» деп эрге-байдалдыг. Саян Хертек 2017 чылда Сочи хоорайга эрткен самбога делегей чемпионадынга бирги алдын медалын чаалап алган. Делегей чемпионаттарынга (2019, 2021) ийи удаа мөңгүн медальдарны, бир хүлер медальды (2012) чаалап алган. Самбога делегей Кубогу дээш маргылдааның дөрт дакпыр чемпиону (2013, 2015, 2019, 2020).
Бо хүнде Тывада тудуп турар самбо залынга, чурттуң болгаш төрээн чериниң мурнунга ачы-хавыяазы дээш Саян Хертектиң адын тыпсыр деп турарын Субудай Монгуш дыңнаткан. Тываның Баштыңы Владислав Ховалыг төрээн черинге квартирадан спортчуга аңгылап бээр айтырыгны шиитпирлээрин спорт сайыдынга дааскан.
Тываның Чазааның парлалга албаны.