Делегей чемпиону деп атты төлептии-биле чаалап алганнар

Тываныӊ спортчулары 2022 чылдыӊ Делегей чемпионнары болган деп өөрүнчүг медээ эрткен дыштаныр хүннерде дыӊналып келген.
Делегейниӊ спортчу ареназынга Россияныӊ адын камгалап, улуг маргылдаага төлептии-биле киришкеннерниӊ бирээзи – Саян Хертек. Амгы үеде ол Москва хоорайда чурттап турар.

Самбо талазы-биле делегей чемпионады Кыргыстанныӊ төвү Бишкек хоорайга болуп эрткен. 58 кил деӊзилиг спортчулар аразынга ол чемпион болуп шүглүп үнгеш, Делегейниӊ ийи дапкыр чемпиону апарган.
Олча Моӊгуш - Тываныӊ күрүне университединиӊ студентизи.
"Кубок содружества" Делегейниӊ ММА талазы-биле турнири Ханты-Мансийск автономнуг округтуӊ Югра хоорайга ноябрь 9-13 хүннеринде болуп турган.
Бодунуӊ удурланыкчызы узун шыырак-даа болза, Олча Моӊгуш аваангыр дайынчы болгаш, 3 дугаар раунд үезинде удурланыкчызын техниктиг нокаутче чыгапкаш, Делегей чемпиону деп атты чаалап алган.

Республиканыӊ спорт яамызыныӊ медээлери-биле Р.Демчик белеткээн.