Ноябрь 22–24 хүннеринде Ханты-Мансийскиге 35 аңгы чурттан 160 спортчунуң тевер-шанчар, хүрежир, сегиржип алыышкынның (единоборство) холушкак хевиринге (ММА) Делегейниң бирги чери дээш маргылдаа болуп эрткен. Маргылдааның түңнелинде Россияның спортчулары 14 алдын медальды тус-тузунда чаалап алгаш, команда талазы-биле 1-ги черге төлептиг болган. Тываның төлээзи Олча Монгуш хүлер медальга төлептиг болган.
Ол-ла хүннерде, ноябрь 20–22 хүннеринде, Арменияның төвү Ереван хоорайга шериглер аразынга спортчу хүрештерге (грек-рим, хостуг хүрештерге) 400 ажыг мөгелер киржилгелиг Делегейниң бирги чери дээш хүреш маргылдаазы болган. Түңнелинде, Россияның мөгелери команда талазы-биле 1-ги черни чаалап алган. Аңаа Амир Чамзын 61 килдиг мөгелер аразынга 3-кү черни ээлеп, хүлер медальдың эдилекчизи болган.
А.ЧАМБАЛ-ООЛ.
“Шын” №92 2024 чылдың ноябрь 30