Бөгүн, ноябрь 21-де, Тываның Баштыңы Владислав Ховалыг "Россия" делгелге-шуулганда киржип турар. Шуулганның шөлдеринге янзы-бүрү культурлуг хемчеглерден аңгыда, стратегтиг сессияны база организастаан.
«Чоокта чаа тургускан бүгү Сибирьниң хөгжүлдезиниң Стратегиязының ужур-утказын тодаргайлап демдегледим. 2035 чылга чедир өске регионнар-биле Сибирьниң чаңгыс аай экономиктиг байдалын хевирлевишаан, бот-боттарывыстың күштүг талаларын ажыглап өөренир бис. Тывага – ооң географтыг туружу-дур. Боттарывыстың болгаш кожаларывыстың чаагай чоруу дээш ону ажыглаар бис.
Бо хүнде Тывадан Моолче Хандагайты – Боршоо автомобиль эрттирилге пунктузун чаартыр ажылдарны чорудуп, Кызылдың аэропортунуң агаар эрттирилге пунктузун база эде кылып турар бис. Төп-Евразия демир-орук коридорун тургузарынче онзагай кичээнгейни салып турар. Бо тема бистиң Президентивис Владимир Путинни сонуургадып турар. Ам чүгле кандыг схема-биле ону боттандырар дугайында айтырыг бар. Деткимчени чедип алыр дээш, федералдыг эрге-чагырга органнары-биле ажылдап турар бис.
СФО-нуң хөгжүлдезиниң Стратегиязынче Тывадан үлетпүр төлевилелдери-биле деңге орук-транспорт хөгжүлдезинче угланган төлевилелдер кирип турар. Бо сорулганы бүгү Сибирьге ажык-дузалыг болур кылдыр шиитпирлээри чогумчалыг. Моол биле Кыдатче Тыва таварыштыр транзитти тургусканы-биле бүгү Сибирь федералдыг округтуң ажыл-агыйжы идепкейи күштелир» – деп, Владислав Ховалыг демдеглээн.