Кызыл хоорайның Төлээлекчилер хуралының депутаттары Россияның Украинада чорудуп турары тускай шериг операцияда Тывадан киржип турар дайынчыларга материалдыг дузаны удаа-дараа чедирип келгеннер.
Депутат албан-хүлээлгелерин күүсеткени-биле холбашкан чарыгдалдарны боттарынга төледип алырындан депутаттар ойталааш, ол акшаны дайынчыларга дузаны доктаамал көргүзеринге чарыгдаар деп шиитпирлээннер.
2023 чылдың эгезинден бээр үеде Кызылдың Төлээлекчилер хуралының депутаттары 3,5 сая рубль акшаның дузазын 55 дугаар гвардейжи даг-адыгжы бригаданың дайынчыларынга болгаш бистиң чаңгыс чер чурттугларывыс дайынчы албан-хүлээлгезин күүседип турар өске-даа шериг кезектеринге чедирген. Дайынчы хөделиишкиннерге эргежок чугула дериг-херекселдерни, автомототранспорт аймаа дээш өске-даа чүүлдерни дуза кылдыр тускай шериг операцияда дайынчыларже чоруткан.
Ноябрь 6-да Кызылдың депутаттары 55 дугаар гвардейжи даг-адыгжы бригаданың дайынчыларынга дүрген чоруктуг мотоциклди, электри генераторун болгаш дроннарны 500 метр хире ыракка дилеп тып шыдаар тускай херекселди дамчыдып берген.
Депутаттарның бергени техника аймаан 55-ки гвардейжи даг-адыгжы бригаданың төлээлери дайынчылар хүлээп алган. Дайынчы хөделиишкиннерни чорударынга депутаттарның дузага берген техниказы дыка ажыктыг, мотоциклди мурнуку одуругда дайынчыларга аъш-чем, ок-чепсекти дүрген чедиреринге, балыглатканнарны тулчуушкун шөлүнден үндүр сөөртүрүнге херек деп 55-ки гвардейжи даг-адыгжы бригаданың техника септээр ротазының командириниң албан-хүлээлгезин түр када күүседип турар старшина М. Саая чугаалаан.
Автомашиналар, мотоциклдер дээш тускай шериг операциязының киржикчилеринге дуза техника аймаан “Чаңгыс демниг Россия” биле Улусчу фронтунуң шугуму-биле чорудуп турар.
Ш. МОҢГУШ.
Буян ООРЖАКТЫҢ тырттырган чуруктары.
“Шын” №86 2024 чылдың ноябрь 9
Депутаттарның дузазы
9 ноября 2024
3