Январь 30-де “Ада-чурттуң камгалакчылары” күрүне фондузунга ээлчеглиг дуза чедирилгезин дамчыткан. Аңаа бо удаада республиканың Казначейство албан чериниң, В. Көк-оол аттыг Национал хөгжүм-шии театрының коллективтери болгаш өөредилге адырының профэвилели киришкен.
Тывада Казначейство албан чери дайынчыларга 10 дугаар ачы-дузаны чедирип турар. Ниитизи-биле бүдүн чартык сая рубльга квадрокоптерни, 2 тепловизор хараалын, дайзынга эскертинмес кылдыр кедип алыр кышкы хептерни саткан. 4 радиостанцияны, пулемёттуң даажын чидирер 3 херекселди, 3 пламегасительди чагыдыпкан, февраль 9-та келирге, база чорудар дээш манап турар. “Ук дериг-херекселдерни дайынчыларның чагаан херекселдериниң даңзызындан көрүп тургаш саткан бис” – деп, республиканың Казначейство албан чериниң удуртукчузу Солаңгы Саая чугаалаан.
Тываның башкылары база сагыш амыр олурбаан дээрзин ТР-де өөредилге адырының профэвилелиниң даргазы Надежда Охемчик демдеглээн. ТШО эгезинден тура аъш-чем, эм-таң, идик-хеп аймаан дузалап турганнар. Эрткен чылдың октябрь айда өөредилге адырының профэвилелиниң бүгү республикада кежигүннери 400 муң акшаны чыггаш, 2 квадрокоптерни, 2 рацияны саткан. 2023 чылда ниитизи-биле 150 муң рубльга ачы-дузаны чедирген.
В. Көк-оол аттыг Национал хөгжүм-шии театры көргүскен шиилеринден кирген акша-хөреңгиниң каш хуузун база ТШО киржикчилеринге дуза чедирери-биле чыггаш, дронга удур ажыглаар дериг-херекселди чорудуп турарлар. Ооң мурнунда дронну база чорутканнар.
“Чаңгыс чуртта чурттап чоруур болганывыста, сорулгавыс база чаңгыс болур ужурлуг. Бистиң оолдарывыс ында дайылдажып турар болганда, оларга дузалажыр ужурлуг хүлээлгевис-тир”– деп, В. Көк-оол аттыг Национал хөгжүм-шии театрының кол режиссёру Леонид Каң-оол чугаалаан.
Ол техниктиг дериг-херекселдерни ТШО-да киржип турар дайынчы чаңгыс чер чурттугларывысче Шагаа байырлалын уткуштур белеткээн гуманитарлыг дуза-биле кады чорудар.
Чыжыргана СААЯ.
Буян Ооржактың тырттырган чуруу.
«Шын» №7 2024 чылдың январь 31