Тус черниң бараан бүдүрүкчүлериниң аразында тыва национал дериг-херекселдер, идик-хеп, суй-белектер кылып турар сайгарлыкчыларның кылган ажылдары кезээде хереглелдиг болуру билдингир. Республикада туризмни сайзырадыр улуг сорулга салдынган болганда, ол бүгүнү кылып, бүдүрүп турар сайгарлыкчылар хөй болуру чугула. Ындыг-даа болза национал темадан аңгыда, өске угланыышкынныг ажылдап турар сайгарлыкчылар эвээш эвес. Оларның кылып, бүдүрүп турар ажылдары чонга дөмей-ле хереглелдиг дээрзин бирги республика чергелиг “Ус-куш” делгелге-ярмаркага киржип келген сайгарлыкчыларның делгээн ажылдары бадыткап турган.
База бир солун угланыышкын-биле ажылдап турар сайгарлыкчыларның бирээзи Рада Ширинен. Ол уруглар садтары, садыг-саарылга төптери, кафе, уругларга көрдүнген шөлчүгештер дээш анаа бажыңнарның-даа девискээриниң ишти-даштынга янзы-бүрү каасталгалыг шимелде кылыр биче сайгарлыкчы херээн ажыдып алган. Болган республика чергелиг делгелгеге бир дугаар киржип чедип кээрге, ооң чижек кылдыр салып көргүскен ажылын улус дыка сонуургаар болган.
– Бис өг-бүлевис-биле чоокта чаа ажылдап эгелээн бис. Ажылывыс утказы – девискээр шимелдези, чоннуң кичээнгейин хаара тудар тускай каасталгазы азы рекламазы-даа бооп болур чүүлдерни кылып турар бис. Ол дээрге аңгы-аңгы хемчээлдиг аң-мең дүрзүлери, чемненир черлерге улуг хемчээлдиг пирожное, мороженое дээш өске-даа чүүлдерниң хевирлерин болгаш чүгле сөзүглелдер-даа бооп болур. Кол ажыглап турар материалдарывыска чук көвүүнден кылган чиик материал (пенополистирол) болгаш стеклопластик хамааржыр. Ону соңгаартан аңгы чагыдып ап турар бис. Бо ажылды эгелээрде, элээн улуг хемчээлдиг акша-түңнү үндүргеш, чаа-ла ажылдап эгелээнивис бо. Амдыызында тускай мастерская чок, ындыг-даа болза боттарывыс бажыңывыс девискээринде кылып тур бис. Ийи уруглар садындан чагыглар кирди. Ол ышкаш уруг-дарыының төрүттүнген хүнүнде онзагай шимелдени база чагыкчылар киирип эгелей берген. Мындыг делгелгелерге киржип-даа көрбээн болгаш, кандыг эвес дээш, ажылдарывысты салып, делгээривиске, улус дораан сонуургап, чагыгларны удаа-дараа киирип эгелээнинге өөрүвес аргавыс чок.
Биче бизнезин чаа эгелеп алган сайгарлыкчыларның делгелгеге салган ажылдары, шынап-ла, хөй кижиниң кичээнгейин хаара тудуп турарын бодаарга, оларның кылып турар ажылы чонга ажыктыг дээрзи илдең. Чагыглар кылдырар күзелдиг улус бо сайгарлыкчыларны тып алыры белен. Социал четкилерде “selena dekor_17” дээш диледиптерге, ында бүгү ажылдарын салып эгелээн.
Амдыызында кандыг-даа күрүне деткимчези ап көрбээн-даа болза, биче бизнести деткиир аңгы-аңгы программалар бар дээрзин эгелеп чоруур сайгарлыкчылар делгелгеге киришкеш, билип алганнар. Олар удавас ажылының хемчээлин калбартып, күжениишкинниг ажылдаар сорулганы салып турар.
Карина Монгуш.
Чуруктар авторнуу